Gazetar: Mihaillo Donev
Anëtarët e zgjedhur të Këshillit Gjyqësor, Suzana Joshevska-Anastasovska dhe Arlinda Kadri-Shahinoviq, bënë betimin në Kuvend dhe dhanë deklarata për përgjegjësi personale para kryeparlamentarit. Kryetari i Këshillit Gjyqësor, Aleksandar Kambovski, siguron se këshilli ka fituar profesionistë të nivelit të lartë dhe se institucioni më në fund do të arrijë të qëndrojë mbi baza të forta.
“Jam i sigurt se kemi fituar dy profesionistë të nivelit të lartë dhe se ata do të jenë një vlerë e shtuar për këshillin, dhe se këshilli më në fund do të mund të qëndrojë mbi baza të forta dhe të ushtrojë kompetencat që ka”, tha Aleksandar Kambovski, kryetar i Këshillit Gjyqësor.
Joshevska-Anastasovska tha se qëllimi është që Këshilli Gjyqësor të bëhet institucion transparent dhe i pavarur, dhe hapi i parë drejt këtij qëllimi, sipas saj, është zbatimi i ligjit të ri për Këshillin Gjyqësor.
“Mendoj se duhet të fillojmë zbatimin e ligjit të ri për Këshillin Gjyqësor, të miratojmë aktet nënligjore që lidhen me ligjin e ri dhe prej aty të kemi një bazë të mirë me forca të reja për të ndërtuar një institucion të fortë”, u shpreh Suzana Joshevska-Anastasovska, Anëtare e Këshillit Gjyqësor.
Pikërisht muajin e kaluar, deputetët miratuan ligjin e ri për Këshillin Gjyqësor, i cili, ndër të tjera, përfshin një përkufizim për termin ‘jurist i shquar’, dhe ka gjithashtu ndryshime në kriteret për zgjedhjen e një anëtari të ri të këshillit.
Siç theksoi kryetari i Kuvendit, Afrim Gashi, kjo do të thotë se me shumë gjasa do të duhet të përsëritet e gjithë procedura për zgjedhjen e një anëtari të ri të këshillit që zgjidhet në Kuvend, pasi muajin e kaluar grupi parlamentar i VLEN-it në Kuvend propozoi për anëtar të ri Alban Kadriun, jurist i diplomuar, me përvojë pune në MPB. Gashi tha së shpejti se pas propozimit të Kadriut, deputetët miratuan ligjin e ri dhe se procedura do të duhet të përsëritet sipas dispozitave të reja./ Alsat.mk
