Antisemitizmi dhe islamofobia/ Rama shpalos prioritetet e Shqipërisë në Këshillin e Sigurimit

Një fitore për Shqipërinë, kështu e ka konsideruar kryeministri shqiptar Edi Rama, mandatin e Këshillit të Sigurimit që vendi e merr në janar të vitit 2022.

Ndër prioritetet e Shqipërisë gjatë këtij mandati kryeministri listoi luftën kundër çdo forme diskriminimi, antisemitizmi dhe islamofobie. Toleranca ndërfetare si dhe forcimi i rolit të grave në veprimtaritë e ndërtimit të paqes, duke reflektuar frymën feministe të vendit ishin gjithashtu disa nga pikat që Rama i kishte përmendur edhe më herët gjatë fjalës së tij përpara Asamblesë së Përgjithshme të Kombeve të Bashkuara.

Në ceremoninë e pritjes zyrtare, kryeministri e cilësoi anëtarësimin e përkohshëm të Shqipërisë edhe si një arritje për Ballkanin Perëndimor.

Sfidat si tërmeti dhe pandemia që sipas tij janë përballuar me sukses apo kryesimi i OSBE-së, janë shenja se Shqipëria ka fituar maturi dhe besim.

Ndërsa foli për vlerat që vendi do të përcjellë në Këshillimin e Sigurimit, Rama nuk nguroi të përmendte dhe vlerat e Bashkimit Europian të cilat, siç sqaroi dhe vetë kryeministri janë vlera universale.

“Sot Ballkani nuk do të ishte i ndarë deri te vaksinat kundër vdekjes, nga BE, edhe pse jeton fizikisht i rrethuar nga kufijtë e BE. Megjithatë në asnjë mënyrë nuk duhet mohuar se është shumë më mirë të jesh i rrethuar nga kufijtë e BE, se sa nga telat me gjemba”, deklaroi kryeministri Rama.

Këshilli i Sigurimit është ndër organet më të rëndësishme të Organizatës së Kombeve të Bashkuara, që ka për detyrë mirëmbajtjen e paqes dhe sigurisë në mes të kombeve.