Antonio Konte merr lajme të mira nga Milano

Skuadra e Interit ka arritur në Ukrainë për t’u përballur me Shakhtar Donetsk në ndeshjen e dytë të grupit në Ligën e Kampionëve, ndërsa nga Milano trajneri Antonio Konte ka marrë lajme positive. Dy futbollistë të tjerë zikaltër kanë arritur të mposhtin koronavirusin, pasi rezultatet e testeve të kryera nga mesfushori italian Roberto Galiardini dhe portieri rumun Ionut Radu kanë dalë negative.

Të dy futbollistët qëndronin në izolim që prej datës 8 tetor dhe tani nga e enjtja mund të nisin stërvitjen nën urdhrat e Antonio Kontes, ditën e shtunë pritet të akomodohen në pankinë në ndeshjen ndaj Parmës, e vlefshme për javën e 6 të kampionatit italian.

Aktualisht i vetmi i prekur nga koronavirusi te Interi, është Milan Shkriniar, i cili nga dita e nesërme përfundon karantinën 14-ditore në Sllovaki dhe mund të udhëtojë drejt Milanos, ku natyrisht që do t’i duhet të qëndrojë i izoluar deri sa testi të rezultojë negativ.