Ari arrin rekorde historike mes krizës tregtare globale
Ari arrin rekorde historike mes krizës tregtare globale
Çmimet e arit arritën një rekord të ri historik të enjten, ndërsa tregjet e aksioneve dhe nafta e papërpunuar vazhduan rënien mes tensioneve të përshkallëzuara tregtare globale. Investitorët, të shqetësuar për pasiguritë ekonomike dhe politike, po largohen nga aktivet e rrezikshme, duke rritur kërkesën për ar si strehë e sigurt financiare.
Në bursën Comex, ari u rrit me 1.5%, duke kaluar për herë të parë kufirin historik prej 3,000 dollarësh për ons, ndërsa çmimet në tregun vendas u ngjitën me 1.9% në 2,988 dollarë për ons, duke vendosur një tjetër rekord të të gjitha kohërave. Ky trend është nxitur nga dobësimi i dollarit amerikan, blerjet e bankave qendrore dhe frika për një stagflacion të mundshëm, një skenar tradicionalisht i favorshëm për arin.
Lufta tregtare dhe pasiguritë globale
Vendimi i presidentit amerikan Donald Trump për të vendosur tarifa 25% për çelikun dhe aluminin ka shkaktuar një valë hakmarrjesh nga BE-ja dhe Kanadaja. Për më tepër, Trump kërcënoi me një tarifë 200% për verën dhe pijet alkoolike evropiane, duke nxitur shqetësime për një luftë të zgjeruar tregtare dhe ngadalësim të ekonomisë globale.
Tensionet gjeopolitike dhe barrierat tregtare po shtojnë presionet inflacioniste, duke rritur kërkesën për ar si një rezervë vlere më e besueshme. Një skenar i mundshëm i stagflacionit – kombinimi i inflacionit të lartë dhe rritjes së ulët ekonomike – po e bën arin një zgjedhje strategjike për investitorët.
Dobësimi i dollarit dhe roli i bankave qendrore
Indeksi i dollarit amerikan (DXY) ka humbur mbi 5% nga kulmi i tij vjetor në janar, i ndikuar nga pritshmëritë për një ulje më të shpejtë të normave të interesit nga Rezerva Federale. Investitorët tani parashikojnë një ulje të normave në qershor, në vend të shtatorit, duke dobësuar më tej dollarin dhe duke nxitur kërkesën për ar.
Në të njëjtën kohë, bankat qendrore po zhvendosin rezervat e tyre nga obligacionet amerikane në ar, si një mbrojtje kundër paqëndrueshmërisë fiskale dhe rritjes së borxhit të SHBA. Politikat proteksioniste të Trump dhe pasiguritë mbi deficitin federal kanë çuar në uljen e besimit te obligacionet amerikane, duke favorizuar më tej arin si një aset më të qëndrueshëm.
Tregjet e aksioneve dhe energjia në rënie
Ndërsa ari vazhdon të rritet, tregjet e aksioneve dhe çmimet e naftës mbeten nën presion. Indeksi S&P 500 ka rënë me 10% nga niveli i tij më i lartë vjetor, duke hyrë në territor korrigjimi, ndërsa tregjet evropiane po ndjekin të njëjtën prirje negative.
Çmimet e naftës së papërpunuar kanë rënë me 7-8% këtë vit, me Brent dhe West Texas Intermediate (WTI) që luhaten pranë niveleve më të ulëta që nga dhjetori 2021. Perspektiva e një zbutjeje të tensioneve me Rusinë dhe kthimi i furnizimit në treg po krijojnë një presion të mëtejshëm mbi çmimet e energjisë.
Në këtë klimë pasigurie, arin mbetet fituesi i madh, duke konfirmuar edhe një herë statusin e tij si një strehë e sigurt për kapitalin në kohë krizash globale.
