Barcelona mendon për një zëvendësues surprisë në sulm

Robert Levandovski e ka shprehur tashmë dëshirën për të qëndruar pjesë e Barcelonës edhe në sezonin e ardhshëm. Megjithatë, në klubin spanjoll kanë ende dyshimet e tyre për polakun dhe problemet fizike që lidhen me moshën.

Ndaj, në Britani, veçanërisht tabloidi “The Sun” shkruan për një interes të blaugranave për sulmuesin e Liverpullit, Darvin Nunez. Sigurisht, tratativa është nga më të komplikuarat e mundshme sepse uruguajani ka një kontratë që e lidh me “Të Kuqtë” deri në vitin 2028, ndërsa u transferua në “Anfield” në verën e vitit 2022 nga Benfika për shifrën rekord të 100 milionë eurove.

Te Barcelona do të tentojnë të përfitojnë nga largimi i Jurgen Klopp dhe ndryshimet që mund të vijnë si rrjedhojë e kësaj lëvizje te organika e Liverpulit. Megjithatë, e sigurt është se për të mbërritur tek 24-vjeçari, Barcelona duhet të “shkundë” mirë xhepat.