Beyonce, Jay-Z e Gloria Estefan përmenden si dëshmitarë në padinë e re ndaj Diddyt

Reperi amerikan Sean “Diddy” Combs është akuzuar për trafikim njerëzor në një padi të ngritur në Florida të martën, sipas dokumenteve të siguruara nga “Fox News Digital”.

Paditësi Joseph Manzaro, pretendon se është “droguar, transportuar kundër vullnetit të tij dhe është përdhunuar si viktimë e një organizate kriminale të organizuar dhe të mirëkoordinuar që ka vepruar që nga viti 2015”, sipas padisë, ka raportuar “Fox News”.

Si të akuzuar në këtë çështje përmenden Brendan Paul, i cilësuar si korrieri i drogës i Diddyt, Emilio Estefan – bashkëshorti i këngëtares Gloria Estefan – si dhe Adria English, një ish-aktore pornografike që ka ngritur një padi të veçantë kundër Diddyt në vitin 2024 për trafikim seksual.

Sipas padisë, Manzaro ishte droguar dhe “transportuar kundër vullnetit” në një festë të ashtuquajtur “të çmendur” në rezidencën e Estefanëve në Miami, ku Diddy po festonte ditëlindjen e të birit.

Manzaro pretendon se kur rifitoi pjesërisht vetëdijen, u gjend i ekspozuar gjysmë i zhveshur para çiftit të famshëm të showbizit, reperit Jay-Z dhe gruas së tij, këngëtares Beyoncé.

Jay-Z dhe Beyoncé nuk janë të akuzuar në këtë çështje, dhe avokati i Jay-Z, Alex Spiro, ka thënë për “Fox News Digital” se klienti i tij nuk ndodhej në atë zonë në kohën e ngjarjes. Përfaqësuesit e Beyoncé ende nuk kanë komentuar mbi pretendimet.

Sipas dokumenteve, Gloria Estefan dyshohet se ishte e pranishme dhe e pa Manzaron në një gjendje të rënduar shëndetësore.

“Thirrni një ambulancë”, citohet të ketë thënë ajo, por më pas, sipas padisë, ajo “u hesht shpejt” nga i shoqi, Emilio, i cili e largoi nga situata.

Manzaro gjithashtu pretendon se ka parë basketbollistin LeBron James duke kaluar nëpër korridoret e vilës i veshur vetëm me një peshqir të bardhë, dhe se basketbollisti i njohur i ka thënë Glorias: “Ju duhet të bëni diçka për këtë”.

Në padi thuhet gjithashtu se Adria English e ka identifikuar veten si “asistentja personale seksuale e Diddyt” dhe e ka sjellë Manzaron nëpër një tunel të fshehtë që lidhte rezidencën e Estefanëve me atë të Diddyt.

Një nga pjesët më tronditëse të padisë përshkruan momentin kur Manzaro është futur në një dhomë ku ndodheshin Jay-Z dhe Beyoncé, të cilët dyshohet se ishin të pranishëm në festë. Sipas padisë, Beyoncé ka reaguar me habi duke pyetur: “Çfarë është kjo? Për çfarë bëhet fjalë? Pse ky burrë i bardhë gjysmë i zhveshur me një maskë në pjesën intime po qëndron këtu përpara meje?”

Një i pandehur tjetër, Eric Mejias, thuhet se i është përgjigjur: “Diddy do që ai të shohë se çfarë u ndodh spiunëve. Kjo është pjesë e ndëshkimit të tij”.

Në dokumente thuhet se Manzaro është detyruar të kalojë përmes disa dhomave plot me njerëz që e tallnin dhe më pas është urdhëruar nga Diddy: “Ai do ta mësojë sonte çfarë u bëjmë spiunëve. Zhvisheni”.

Padia përshkruan se Manzaro është sulmuar seksualisht dhe është detyruar të marrë pjesë në akte të padëshiruara seksuale. Ai më pas është mbyllur në një dhomë të vogël derisa e ka parë Jacob “The Jeweler” Arobo, i cili dyshohet se ka reaguar me habi duke pyetur: “Çfarë po ndodh me këtë djalë? Pse po më shikon me një maskë në fytyrë?”.

Sipas dokumenteve, Gloria Estefan ka tentuar sërish të ndërhyjë dhe ka kërkuar një ambulancë, por është ndaluar nga i shoqi, Emilio. Manzaro më pas është dërguar në një “shtëpi bande”, ku është rrahur brutalisht.

Në një deklaratë për Fox News Digital, përfaqësuesit e Diddyt i kanë hedhur poshtë pretendimet, duke i quajtur ato “të pavërteta dhe absurde”.

“Kjo padi tregon se deri në çfarë shkalle njerëzit janë të gatshëm të shkojnë për të marrë vëmendje dhe para. Asnjë person me mendje të shëndoshë nuk mund ta besojë këtë histori. Z. Combs mezi pret ta shpalosë të vërtetën në gjykatë”, ka thënë përfaqësuesi i Diddyt.

Ndërkohë, përfaqësuesit e LeBron James kanë mohuar akuzat, duke thënë se ai nuk ishte në Miami gjatë asaj periudhe.

“Kjo është qartësisht e rreme dhe nuk meriton as raportim”, ka thënë një zëdhënës i tij, duke sqaruar se LeBron ka qenë duke luajtur për Cleveland Cavaliers në atë kohë.

Avokati i Jay-Z, Alex Spiro, dha një deklaratë të ngjashme.

“Z. Carter nuk ndodhej në Florida gjatë asaj periudhe dhe aktivitete publike të lehtësisht të verifikueshme e dëshmojnë këtë. Ky është një tjetër pretendim absurd që dëmton besimin në sistemin tonë të drejtësisë”, u shpreh ai.

Përfaqësuesit e Gloria dhe Emilio Estefan gjithashtu kanë mohuar pretendimet dhe kanë thënë se kanë dokumente që vërtetojnë se nuk është zhvilluar asnjë festë në pronën e tyre gjatë viteve 2012 – 2019.

“Gloria dhe Emilio Estefan mohojnë me forcë këto akuza. Shtëpia në fjalë nuk ishte rezidenca e tyre, por një pronë e përdorur nga familja. Nuk është mbajtur asnjë festë aty gjatë periudhës së përmendur. Ne kemi të gjitha dokumentet e nevojshme dhe do t’i paraqesim ato në gjykatë”, ka thënë përfaqësuesi i tyre.

Diddy është nën hetim për trafikim njerëzor që nga muaji mars i vitit 2024 dhe përballet me akuza federale për konspiracion kriminal, trafikim seksual me dhunë, mashtrim dhe detyrim, si dhe transportim për qëllime prostitucioni. Ai ndodhet në paraburgim në Brooklyn të New Yorkut. Mbrojtja në liri i është mohuar tri herë përfshirë dorëzaninë prej 50 milionë dollarësh amerikan.

Nëse shpallet fajtor, ai mund të përballet me një minimum prej 15 vitesh burg ose me dënim maksimal të përjetshëm.