Biden mbërrin në Bregun Perëndimor, pritet të vizitojë Arabinë Saudite për naftën

Presidenti amerikan Joe Biden mbërriti në Bregun Perëndimor, ku u prit nga lideri palestinez Mahmud Abass, sipas France24.

Zyrtarë të Shtëpisë së Bardhë thanë se Biden nuk ka një plan për rinisjen e bisedimeve të paqes mes Izraelit dhe Palestinës por presidenti do të theksojë mbështetjen per zgjidhjen e dy shteteve dhe do të prezantojë një paketë ndihmash ekonomike për Palestinën.

Më pas, kreu i Shtëpisë së Bardhë do të takohet me udhëheqësin de fakto të Arabisë Saudite, princin e kurorës, Muhamed Bin Salman dhe babain e tij, mbretin Salman. 2 vite më parë, Biden ishte zotuar të izolonte Arabinë Saudite, pas vrasjes së gazetari disident, Jamal Khashoggi, nga agjentë sauditë. Princi e mohon përfshirjen, por inteligjenca amerikane arriti në përfundimin se vrasja kishte ndodhur me pëlqimin e tij.

Por kriza botërore e naftës, e nxitur nga lufta ruse në Ukrainë detyroi Shtetet e Bashkuara të kalojnë çështjen në plan të dytë. Arabia Saudite është prodhuesi më i madh i naftës në botë, dhe Biden shpreson të bindë autoritetet atje të rrisin prodhimin dhe furnizimet globale.

Ndalesa e parë e turit në Lindjen e Mesme ishte ne Izrael ku Biden dhe kryeministri Yair Lapid paraqitën një front të bashkuar përballë rrezikut bërthamor të Iranit.