Britania po përgatitet për luftë, Starmer njoftoi “gatishmëri luftarake”

Kryeministri britanik Keir Starmer është zotuar ta vërë vendin e tij në “gatishmëri luftarake”. Starmer njoftoi gjithashtu plane për të ndërtuar 12 nëndetëse të reja sulmuese dhe për të investuar miliarda paund në armë për të forcuar vendin në një botë të zënë midis një Rusie armiqësore dhe agresive dhe një SHBA-je në tërheqje.

Armatimet ambicioze janë pjesë e Rishikimit Strategjik të Mbrojtjes (SDR) të qeverisë, i cili përshkruan një peizazh të ri kërcënues dhe bën thirrje për rritjen e prodhimit të dronëve dhe ruajtjen e sasive më të mëdha të municioneve dhe pajisjeve. Starmer, i cili porositi rishikimin, përshkroi një “epokë të re” kërcënimesh që kërkon një “epokë të re mbrojtjeje dhe sigurie”.

Kërcënimi me të cilin përballemi tani është më serioz, më urgjent dhe më i paparashikueshëm se në çdo kohë që nga Lufta e Ftohtë, tha Starmer, duke treguar për “luftën në Evropë, rreziqet e reja bërthamore, sulmet kibernetike të përditshme” dhe “agresionin rus në rritje” në ujërat dhe qiellin britanik.

Çdo pjesë e shoqërisë, çdo qytetar i këtij vendi, ka një rol për të luajtur sepse duhet ta pranojmë se gjërat kanë ndryshuar, shtoi ai.

Gazeta New York Times raportoi se Starmer, sikur për të theksuar “mesazhin e tij ogurzi”, i paraqiti planet e tij vetëm disa orë pas njërit prej sulmeve ajrore më të fuqishme të luftës trevjeçare në Ukrainë, në të cilën dronët ukrainas sulmuan bazat ajrore thellë në territorin rus.

Rishikimi strategjik, i udhëhequr nga George Robertson, një ish-sekretar i përgjithshëm i NATO-s, u lançua vitin e kaluar, menjëherë pasi Starmer fitoi zgjedhjet e përgjithshme.

Por detyra e tij është bërë më urgjente për shkak të provave në rritje të dobësimit të angazhimit të Presidentit të SHBA-së, Donald Trump, ndaj sigurisë evropiane dhe qëndrimit të tij ndonjëherë shpërfillës ndaj Presidentit rus, Vladimir Putin.