Carovska: Ndryshimet në lëndën e historisë nuk bëhen për të përmbushur kërkesat Bullgarisë

Lënda e historisë dhe të gjitha njësitë mësimore të saja do të vazhdojnë të mësohen nga nxënësit, pavarësisht ndryshimeve në konceptin e ri për arsim. Ministrja e Arsimit, Milla Carovska në emisionin 360 gradë në Alsat përsëriti se këto ndryshime nuk bëhen me qëllim zgjidhjen e mosmarrëveshjeve me Bullgarinë. Ajo tha se koncepti i ri në arsim parashikon organizimin e lëndëve mësimore me qëllim arritjen e rezultateve më të mira te nxënësit.

https://www.youtube.com/watch?v=bJQWP6y4kEI&feature=youtu.be

 Të gjitha lëndët do të mbeten dhe do të mësohen në mënyrë më thelbësore dhe në mënyrë më cilësore. Sepse, përmes procesit të integrimit lejojmë që nxënësi të kuptojë kontekstin e një ngjarjeje historike. Qëllimi i fillimit të reformave nuk ishte se çfarë do të bëjmë me historinë por filloi me atë se si t’i përmirësojmë rezultatet në testimet ndërkombëtare dhe dituritë e nxënësve- Carovska.

Nga Byroja për Zhvillimin e Arsimit thanë se koncepti i ri në arsimin fillor tashmë një kohë të gjatë ishte kërkuar nga mësimdhënësit, nxënësit dhe prindërit. Në anketën e realizuar nga Byroja, mbi 80 % e mësimdhënësve janë shprehur se reformat janë të domosdoshme.

Më shumë se 60 % e tyre janë të mendimit që duhet të ndryshohet plani mësimor, e plani mësimor është ai dokument që përcakton numrin e orëve, lëndëve mësimore dhe përfaqësimin e tyre në vet planin mësimor- pohoi Ajshe Ajrullai, Byroja për Zhvillimin e Arsimit.

Reformat e reja në arsim parashikohen të zbatohen nga viti i ardhshëm shkollor 2020-21. Paralajmërimet për këto reforma u kritikuan ashpër nga njohësit e arsimit të cilët i cilësuan si të përshpejtuara dhe të panevojshme.

Melihate Rustemi