De Luarentis rikthen te Napoli ish-drejtuesin pas 10 vitesh
Valter Mazarri është shumë pranë detyrës së trajnerit të Napoli. Mediat italiane konfirmojnë se trajneri 62-vjeçar ka fituar balotazhin me Igor Tudor për t’u ulur në stolin e skuadrës kampione të Italisë. Gjithsesi, kjo detyrë për Mazarrin do të jetë vetëm për 6 muaj, deri në fund të këtij sezoni, pa të drejtë rinovimi të kontratës. Duket se trajneri ka pranuar këtë mundësi, duke qenë se nuk drejton një ekip prej gati një viti.
Mazarri ka qenë edhe më parë trajner i Napoli, në sezonet 2009-2013. Ai do të zërë vendin e trajnerit Rudi Garsia, që pritet të shkarkohet zyrtarisht sot nga klubi i Napoli, pas humbjes 0-1 që pësoi në shtëpi nga Empoli. Presidenti De Laurentiis është i idesë që të marrë një trajner të përkohshëm, deri në fund të sezonit.
Objektivi i Mazari do të jetë i thjeshtë, të mbajë ekipin mes 4 skuadrave që do të luajnë në Ligën e Kampionëve. Ndërsa në korrik, kur të nisë sezoni i ri, klubi napoletan mund të ulë në stol Igor Tudor. Të dy kandidatët për stolin e Napoli kanë takuar presidentin De Laurentiis, që ka vendosur të bëjë këtë zgjidhje.
