Diabeti i tipit 2 rrit ndjeshëm rrezikun e formave më vdekjeprurëse të kancerit

Analizat e të dhënave shëndetësore të 95,000 njerëzve treguan se rreziku i kancerit të pankreasit ishte pothuajse dyfishi, dhe i kancerit të mëlçisë pesëfishuar, te gratë që ishin diagnostikuar me diabet të tipit 2.

Shanset e zhvillimit të këtyre sëmundjeve vdekjeprurëse janë gjithashtu më të larta tek meshkujt me diabet të tipit 2, i cili lidhet me një rritje prej 74 për qind të rrezikut të kancerit të pankreasit dhe një rritje gati katërfish të rrezikut të kancerit të mëlçisë.

Një rritje më e vogël e rrezikut u pa për kancerin kolorektal – një rrezik 34 për qind në rritje te gratë dhe 27 për qind te burrat krahasuar me ata pa diabet të tipit 2.

“Diabeti dhe obeziteti prekin të njëjtat lloje të kancerit. Hulumtimi ynë synoi të zbulonte efektet e diabetit në zhvillimin e kancerit pas përshtatjes për faktorë të tjerë rreziku, siç është obeziteti”, shpjegon Owen Tipping, një student i diplomuar që punoi në studim me profesorin Andrew Renehan nga Universiteti i Mançesterit.

Si i morën shkencëtarët këto të dhëna?

Studimet e mëparshme kanë lidhur obezitetin me 13 lloje të kancerit, shumë prej të cilëve ndodhin më shpesh tek njerëzit me diabet. Megjithatë, ekspertët kanë pasur vështirësi të përcaktojnë nëse vetë diabeti rrit rrezikun e disa llojeve të kancerit.

Prandaj, shkencëtarët analizuan bazën e të dhënave biologjike të Mbretërisë së Bashkuar, e cila përmban të dhëna mbi historinë shëndetësore dhe zakonet e jetesës së më shumë se gjysmë milioni njerëzve. Ata ekzaminuan grafikët e 23,750 njerëzve që ishin diagnostikuar kohët e fundit me diabet të tipit 2 dhe i krahasuan ato me të dhënat nga më shumë se 70,000 njerëz pa diabet.

Ka një tendencë të rritjes së diagnozave të kancerit menjëherë pas zbulimit të diabetit, pasi pacientët i nënshtrohen analizave më të shpeshta gjatë asaj periudhe.

Duke marrë parasysh këtë, ekspertët britanikë përjashtuan të gjitha rastet në të cilat kanceri u diagnostikua në vitin e parë pas zbulimit të diabetit.

Sipas studimit, në pesë vitet e para pas diagnozës, mundësia e zhvillimit të kancerit të lidhur me obezitetin ishte 48 për qind më e lartë tek meshkujt dhe 24 për qind më e lartë tek femrat.

Gjithashtu, disa lloje të kancerit nuk u shoqëruan me një rrezik më të lartë pas një diagnoze të diabetit të tipit 2. Për shembull, gratë me diabet nuk kishin më shumë gjasa të zhvillonin kancer endometrial ose kancer të gjirit në krahasim me ato pa diabet.