Dramë me pengje në qendrën ruse të paraburgimit, raportohet për të vdekur

Disa pengmarrës janë vrarë në një operacion për lirimin e dy rojeve të burgut që ata mbanin në qytetin jugor të Rusisë, Rostov, raportojnë mediat ruse. Rojet thuhet se nuk janë lënduar pasi forcat speciale hynë në qendër.

Gjashtë burrat, të cilët mbaheshin në një qendër paraburgimi, thuhet se ishin të armatosur me thika. Ata po përballeshin me akuza për terrorizëm, duke përfshirë lidhjet me grupin Shteti Islamik (IS).

Ata kishin kërkuar një automjet, armë zjarri dhe kalim të lirë nga qendra. Policia dhe garda kombëtare u thirrën në vendngjarje kur raportet për marrjen e pengjeve dolën për herë të parë të dielën në mëngjes, raporton BBC, transmeton Klankosova.tv.

Në një video të publikuar nga të burgosurit, një nga pengjet dëgjohet të thotë se të arrestuarit kanë “qëllime serioze”.
Të arrestuarit thanë se ishin anëtarë të IS dhe se veprimet e tyre “nuk ishin spontane”.

Raportet thonë se ata arritën të kontrabandonin thika, flamuj të IS dhe telefona celularë në qelitë e tyre.
Ata rrëzuan hekurat e dritares së qelisë dhe hynë në dhomën e rojeve, ku mundën të kapnin pengjet.

Disa sulme të pretenduara nga IS janë kryer në tokën ruse, më e fundit në mars të këtij viti kur persona të armatosur hapën zjarr në një sallë koncertesh në Moskë duke vrarë 145 njerëz dhe duke plagosur më shumë se 500.

Rusia u përpoq ta lidhë sulmin me Ukrainën, por Kievi menjëherë mohoi çdo përfshirje.