E ke lënë duhanin? Ja sa kohë duhet për të reduktuar rrezikun e sëmundjeve të zemrës

Në studimin e publikuar në revistën JAMA, shkencëtarët nga Koreja e Jugut ekzaminuan të dhënat shëndetësore të më shumë se 100,000 ish-duhanpirësve dhe më shumë se katër milionë njerëzve që nuk kishin pirë kurrë duhan. Ish-duhanpirësit u ndoqën për 10 vjet pasi e lanë duhanin. Janë regjistruar edhe detaje të tjera, duke përfshirë moshën, sa vjeç kanë qenë kur kanë filluar të pinë duhan, sa cigare kanë pirë në ditë dhe sa vjeç kanë qenë kur kanë lënë duhanin.

Studimi zbuloi se lidhja midis pirjes së duhanit dhe rrezikut të sëmundjeve kardiovaskulare ishte e varur nga doza – që do të thotë se për ata që ishin duhanpirës “të lehtë”, rreziku ra në mënyrë dramatike relativisht shpejt pas lënies së duhanit.

Por për ish-duhanpirësit “të rëndë”, të cilët pinë duhan për të paktën tetë vjet, studiuesit arritën në përfundimin se mund të duhen 25 vjet që rreziku i sulmit në zemër dhe goditjes në tru të bjerë në atë të një personi që nuk pi duhan kurrë.

Ish-duhanpirësit “e rëndë” duhet të konsiderohen se kanë të njëjtin rrezik të sëmundjeve kardiovaskulare si pacientët që vazhdojnë të pinë duhan, thanë autorët e studimit.

Dhjetra studime kanë treguar se pirja e duhanit është e lidhur me dështimin e zemrës – kur muskuli i zemrës nuk pompon gjakun në trup ashtu siç duhet, zakonisht sepse është shumë i dobët ose i ngurtë.

Si rezultat, zemra nuk mund të furnizojë organet dhe indet me oksigjen dhe lëndë ushqyese jetike të nevojshme për punën normale. 7000 kimikatet në duhan – duke përfshirë katranin dhe të tjerët – mund të dëmtojnë enët e gjakut që furnizojnë zemrën, e cila mendohet të jetë përgjegjëse për disa nga dëmet që duhani i shkakton zemrës.