Ecja deri në 10,000 hapa në ditë zvogëlon rrezikun e sëmundjeve të zemrës dhe vdekjes së hershme, edhe nëse njerëzit e kalojnë pjesën më të madhe të ditëve ulur, tregon një studim i ri.

Ekspertët kanë zbuluar më parë se njerëzit që kalojnë shumë kohë ulur, për shembull në një tavolinë ose duke parë TV, kanë më shumë gjasa të zhvillojnë sëmundje të zemrës dhe vdekje të parakohshme. Por deri më tani nuk ishte e qartë nëse ecja mund të kompensonte efektet e qëndrimit ulur për pjesën më të madhe të ditës.

Një studim i ri i botuar në British Journal of Sports Medicine zbuloi se çdo hap shtesë mbi 2200 hapa në ditë – deri në rreth 10,000 – redukton këto rreziqe, pavarësisht se sa kohë kaloni ulur.

Ekspertët kanë zbuluar se njerëzit që bëjnë 9000 deri në 10500 hapa në ditë kanë rrezikun më të ulët të vdekjes së hershme. Kur bëhet fjalë për shmangien e goditjes në tru dhe sulmit në zemër, njerëzit që bënin rreth 9700 hapa në ditë kishin rrezikun më të ulët.

Për studimin, të udhëhequr nga Universiteti i Sidneit, ekspertët përdorën të dhënat e Biobank në Mbretërinë e Bashkuar nga 72,174 njerëz të moshës rreth 61 vjeç. Të gjithë mbanin një përshpejtues dore për të matur nivelin e tyre të stërvitjes.

Gjatë gati shtatë viteve të ndjekjes, pati 1,633 vdekje dhe 6,190 ngjarje kardiovaskulare, të tilla si sulme në zemër ose goditje në tru.

Rezultatet treguan se çdo hap në ditë mbi 2200 shoqërohej me një rrezik më të ulët të vdekjes dhe sëmundjeve të zemrës, pavarësisht nga koha e kaluar ulur, por përfitimet rriteshin sa më shumë hapat të bënin njerëzit.

Në përgjithësi, 9,000 deri në 10,500 hapa në ditë reduktojnë rrezikun e vdekjes së hershme me 39 përqind dhe rrezikun e sulmit në zemër ose goditjes me 21 përqind. Në të dyja rastet, 50 për qind e përfitimit u arrit midis 4000 dhe 4500 hapave në ditë.

Një tjetër studim i publikuar në Journal of Neurology, Neurosurgery and Psychiatry zbuloi se edhe nivelet e ulëta të ushtrimeve mund të ndihmojnë në uljen e rrezikut të goditjes në tru.

“Njerëzit duhet të inkurajohen të jenë fizikisht aktivë edhe në nivelet më të ulëta,” thanë studiuesit e përfshirë në studim, duke përfshirë Imperial College London.