Enrike nuk e preferon, PSZH nxjerr në shitje mbrojtësin sllovak
Milan Shkriniar zgjodhi të thyejë raportet e tij me Interin dhe tifozerinë zikaltër, për t’u transferuar një vit më parë te Paris Sen Zhermenin me parametra zero, megjithatë aventura franceze nuk ka shkuar aspak mirë për mbrojtësin sllovak.
Pas një nisjeje si titullar, Shkriniar shfaqi disa probleme fizike dhe së fundi ndonëse plotësisht i rikuperuar, po ngroh stolin, pasi nuk preferohet më nga trajneri Luis Enrike.
Sipas “L’Equipe”, spanjolli nuk e sheh Shkriniarin si të përshtatshëm për idetë e tij në futboll dhe ndërtimin e lojës nga mbrapa, ndaj ka dhënë miratimin për shitjen e sllovakut gjatë merkatos së verës.
Tashmë mbetet të shihet cila do të jetë zgjidha e mbrojtësit 28-vjeçar, që mund të pranojë largimin në një tjetër kampionat, ose të zgjedhë të qëndrojë në Paris, për të përfituar pagën e lartë dhe të shpresojë t’i ndryshojë mendjen Luis Enrike-s.
