Presidenti turk, Recep Tayyip Erdogan, tha se Turqia dhe Shtetet e Bashkuara duhet t’u japin një shtysë të re marrëdhënieve të tyre dhe të lënë pas pengesat që ekzistojnë midis tyre. Në darkën gala “100 Vjet Miqësi” në Nju Jork, ai tha se ishte koha për të forcuar aleancën.
“Ne duam të arrijmë një vrull të ri dhe të lëmë pas pengesat që nuk duhet të kishin ekzistuar kurrë midis dy aleatëve “, tha Erdogan.
Ai theksoi se është thelbësore të përmirësohet industria e mbrojtjes, e cila tradicionalisht ka qenë një nga fushat më të forta të partneritetit turko-amerikan, si në planin dypalësh ashtu edhe brenda NATO-s.
Ai shtoi se Turqia është e gatshme të forcojë bashkëpunimin me Shtetet e Bashkuara në fusha të tilla si energjia bërthamore, gazi natyror i lëngshëm (LNG), aviacioni civil dhe teknologjia e lartë.
“Do të jetë në interesin tonë të ndërsjellë të thellojmë bashkëpunimin me SHBA-në në një mënyrë shumëdimensionale, duke përfshirë mundësitë për prodhim të përbashkët”, tha ai.
Erdogan theksoi se kompanitë turke kanë arritur një nivel që u lejon atyre të investojnë në Shtetet e Bashkuara. Ai shprehu gjithashtu besimin se Turqia së shpejti do të jetë ndër 10 eksportuesit më të mëdhenj të mbrojtjes në botë.
“Shpresoj që lidhjet dhe aleanca e fortë midis Turqisë dhe Shteteve të Bashkuara do të bëhen edhe më të forta në shekullin e dytë të marrëdhënieve tona diplomatike”, tha ai.
Presidenti turk deklaroi gjithashtu se Turqia, pavarësisht krizave dhe konflikteve në mjedisin përreth, ka ruajtur dhe forcuar pozicionin e saj si një “ishull stabiliteti”.
