Familjarët e të riut nga Kumanova të zhgënjyer nga institucionet, kërkojnë ndihmë nga rajoni

Gazetar: Bashkim Sulejmani

Tre ditë kërkime, asnjë gjurmë nga studenti kumanovar i aksidentuar në afërsi të Zhelinës kur me veturën e tij përfundoi në lumin Vardar. Familjarët shprehen të revoltuar, thonë se kompetentët të kërkojnë ndihmë nga shtetet fqinje.

“Meqë sot u bënë tre ditë ne nga shteti jonë i kemi humb shpresat. Vijnë shikojnë hyjnë ama asgjë. Ju apeloj që të kërkojnë nga jashtë ndihmë, kemi Shqipërinë, Bullgarinë, Kosovën, që kanë mjete më të specializuara. Nuk ka organizim nga shteti përveç vullnetarëve të Zhelinës dhe familja shoqëria jonë që punojnë. Fshatarët e Zhelinës sot kërkuan nga shoqata e zhytësve që t`iu sjellin pesë palë tesha që vetë vullnetarisht të futen që ta kërkojmë vet”, tha një familjar i Erdoanit.

Në ndihmë të familjarëve dhe zhytësve erdhën edhe disa fshatarë të Radushës. Thonë se e njohin terrenin dhe të njëjtët, vullnetarisht janë kyçur në kërkim nëpër lum.

“Në bazë të përvojës që kemi sepse jemi fshat rreth lumit, u organizuam bashkë me fshatrat tjerë që me mjetet që kemi, po iu sugjeruam edhe banorëve të zhelinës me shkopinj me grepa ta kontrollojmë çdo cep”, Rafiz Aliti, banor i Radushës.

“Përveç kërkuesve të qendrës për mbrojtje dhe shpëtim dhe kërkuesve të zjarrfikësve, kërkimet sot janë zgjeruar edhe me tetë pjesëtare të MPB-së këtu në Zhelinë, ndërsa zgjerimi i kërkimit ka vazhduar edhe në pjesën mes Shkupit dhe Velesit në vendin e quajtur Zelenikovo, ku zakonisht grumbullohet uji dhe ku janë gjetur persona të humbur”, raporton Bashkim Sulejmani, gazetar.

“Sërish sot në bashkëpunim me policinë dhe zjarrfikësit do vazhdojnë kërkimin dhe ri kërkimin e vendeve të djeshme, sepse uji sot është ngritur më lartë ndoshta do kemi ndonjë ndryshim”, deklaroi Arif Arifi, Qendra për Mbrojtje dhe Shpëtim

Edhe pse autoritetet nuk japin detaje për shkaqet e aksidentit dhe numrin e udhëtarëve, familjarët thanë se Erdoni kishte shkuar në Tetovë për të kryer pagesat e studimeve dhe po udhëtonte i vetëm. /Alsat.mk