Futbollisti brazilian fillon grevën e urisë në burg
Dani Alves, i cili ndodhet në burg prej gati dy muajsh, nuk mund të gjejë paqe, pasi u akuzua për përdhunim nga një vajzë e re 23-vjeçare. Incidenti i pretenduar me ish-mbrojtësin e disa skuadrave të njohura ndodhi në një klub nate në Barcelonë, natën e 31 dhjetorit.
Për më tepër, sipas medias spanjolle, braziliani më i titulluar në historinë e futbollit ka nisur tashmë një grevë urie. Burimet nga burgu kanë treguar se ish-futbollisti i Barcelonës “është krejtësisht i shkatërruar dhe ka ditë që nuk ha fare”.
E gjitha kjo pasi bashkëshortja e tij, modelja Joana Sanz e la, i ka kërkuar divorcin dhe nuk dëshiron më të dijë asgjë për këtë, pasi ka hequr edhe shumë foto me të nga profili zyrtar në Instagram. Burime të tjera zbulojnë gjithashtu se Dani Alves nuk e ka humbur dëshirën për të luajtur futboll, duke qenë se debutoi në një ekip të burgut javën e kaluar.
