Gjysmë milioni emigrantësh u janë dhënë leje qëndrimi dhe pune në Spanjë

“Këta njerëz do të jenë në gjendje të punojnë në çdo sektor dhe në çdo pjesë të vendit”, tha Ministrja spanjolle e Migracionit, Elma Saiz, në një konferencë për shtyp.

Qeveria beson se masa do të ndihmojë në plotësimin e mungesës së fuqisë punëtore dhe do të kontribuojë në përballimin e popullsisë në plakje, e cila konsiderohet një kërcënim serioz për sistemin e pensioneve dhe atë social.

Masa zbatohet për shtetasit e huaj që kanë banuar në Spanjë vazhdimisht për të paktën pesë muaj deri më 31 dhjetor, si dhe për ata që kanë aplikuar për mbrojtje ndërkombëtare para asaj date. Aplikantët do të duhet të paraqesin një dokument publik ose privat ose një kombinim të të dyjave si provë të qëndrimit.

Kushtet shtesë janë: të kenë të kaluar të pastër penale, të mos paraqesin kërcënim për rendin publik dhe lejet do të jenë të vlefshme edhe për fëmijët e tyre që jetojnë tashmë në vend.

Periudha e aplikimit pritet të fillojë në prill dhe të zgjasë deri në fund të qershorit.

Plani do të miratohet me dekret qeveritar dhe nuk do të shkojë për votim në parlament, ku koalicioni i udhëhequr nga socialistët nuk ka shumicën absolute.

Opozita konservatore dhe e ekstremit të djathtë e kritikuan ashpër vendimin, duke argumentuar se kjo do të inkurajonte një valë të re të imigracionit të paligjshëm.

Lideri i Partisë Popullore, Alberto Núñez Feijó, shkroi në rrjetin social X se “plani absurd do të mbingarkojë shërbimet publike”.

“Në Spanjën socialiste, ilegaliteti shpërblehet”, tha Feijó, duke shtuar se nëse vjen në pushtet, do ta ndryshojë politikën e migracionit “nga themelet”.

Nga ana tjetër, Kisha Katolike Spanjolle e mirëpriti këtë veprim, duke e quajtur atë një “akt drejtësie sociale”.

Kryeministri socialist Pedro Sanchez ka argumentuar prej kohësh se Spanja ka nevojë për emigrantë për të kapërcyer mungesën e fuqisë punëtore dhe për të zbutur efektet e një popullsie në plakje.

Të dhënat zyrtare tregojnë se 52,500 nga 76,200 punonjësit e rinj në tremujorin e fundit të vitit të kaluar ishin shtetas të huaj.

Sipas qendrës analitike Funcas, në fillim të janarit 2025, rreth 840,000 migrantë pa dokumente jetonin në Spanjë, shumica e tyre nga Amerika Latine.

Spanja është një nga pikat kryesore të hyrjes për emigrantët në Evropë, veçanërisht përmes Ishujve Kanarie, ku mbërrijnë dhjetëra mijëra njerëz duke ikur nga varfëria, konflikti dhe persekutimi.

Sipas Institutit Kombëtar të Statistikave, më shumë se shtatë milionë të huaj jetojnë në vend nga një popullsi totale prej 49.4 milionë banorësh.