Greqia po lufton për të dytën ditë rresht me disa dhjetëra vatra zjarresh

Greqia po lufton për të dytën ditë rresht me disa dhjetëra vatra zjarresh që kanë shpërthyer në mbarë vendin, sidomos në zonat jugore. Sipas shërbimit zjarrfikës vetëm në 24 orët e fundit kanë rënë 64 zjarre, 45 prej të cilave brenda disa orësh.

Autoritetet kanë dërguar mesazh me numrin e urgjencës 112 për rastet e katastrofave në disa zona në mënyrë që banorët ti evakuojnë ato. Dhjetëra zjarrfikës të ndihmuar nga tetë avionë po përpiqen prej disa orësh të shuajnë zjarret në pyjet e rajonit të Ahaias dhe Ilias në gadishullin e Peloponezit pranë qytetit të Kranidit. Situata bëhet e vështirë pasi në disa raste, shpejtësia e erës i kalon 95 kilometra në orë.

Ndërsa edhe temperaturat janë tepër të larta. Greqia ka vite që përballet me zjarret e mëdha , por ato janë bërë më shkatërruese pasi verat janë bërë më të nxehta dhe më të thata. Ministria e Mbrojtjes civile ka shpallur gjendjen e gatishmërisë.