Grupi mercenar rus Wagner thotë se nuk po rekruton më të burgosur për të luftuar në Ukrainë

Kontraktori ushtarak privat Wagner do të duhet të kërkojë luftëtarë të rinj përtej sistemit të burgjeve të Rusisë, një “terren pjellor” rekrutimi për nëntë muajt e fundit.

Shefi i Wagner, Yevgeny Prigozhin, ka thënë në kanalin Telegram të kompanisë së tij të enjten: “Ne kemi ndërprerë plotësisht rekrutimin e të burgosurve në Wagner PMC. Ata që punojnë për ne tani po i përmbushin të gjitha detyrimet e tyre”.

Oligarku rus nuk dha asnjë arsye për vendimin, por ka disa shpjegime të besueshme për ndryshimin e stilit, shkruan CNN, përcjell Telegrafi.

Grupi i rekrutëve mund të jetë pakësuar, Ministria e Mbrojtjes mund të ketë ndërhyrë ose operacioni mund të ketë “goditur” financat e Prigozhin.

Përndryshe, Prigozhinit mund t’i jetë thënë se mënyra e tij e luftës nuk i përshtatet më prioriteteve ruse në fushën e betejës.

CNN shkruan se foli me dy luftëtarë të Wagner-it, të cilët ishin rekrutuar nga burgjet ruse dhe luftuan në vijën e frontit në Ukrainë përpara se të kapeshin.

Ata thanë se dhjetëra të burgosur, disa me vetëm pak javë të mbetur nga dënimi i tyre, ishin regjistruar pas vizitave nga Prigozhin në gusht dhe shtator.

Ata thanë se ai kishte mbërritur në burgjet e tyre me një helikopter dhe kishte bërë premtime të guximshme për pagat dhe përfitimet e tjera, si dhe një zotim se të dhënat e tyre kriminale do të fshiheshin.

Megjithatë, CNN nuk ka mundur të konfirmonte në mënyrë të pavarur pretendimet.