Gurthemeli për Korridorin 8, pa përfunduar parahetimi

Pllakati për fillimin e ndërtimit të autostradës së Korridorit 8 u vendos edhe përskaj parahetimit në Prokurorinë për Krim të Organizuar dhe Korrupsion, të hapur mbi bazën e zërave në opinion për shkeljet eventuale të procedurave ligjore. Nga Prokuroria sqarojnë se lënda është në fazë parahetimore deri sa prokurori i lëndës të konstatojë nëse ka ose jo elemente të veprës penale. Parahetimi u fillua një javë më herët pas bujës nga raportimet e mediave për dyshimet për shkelje.

Tenderin për mbikëqyrjen e punimeve në Korridoret 8 dhe 10-D e fitoi grupi i kompanive “IRD Inxhiniering”, “Elektrasollushëns”, Evrokonsallting” dhe “EPTISA”. Tri nga katër firmat pjesëmarrësve kontestohen për të paktën një çështje me të cilën cenohet besueshmëria e tyre.

“Elekstrasollushëns”, licencën për mbikëqyrjen e punimeve e ka marrë me inxhinierë të tjerë nga ata të deklaruar në projektin e fundit. Kjo kompani gjithashtu gjatë marrëveshjes ka deklaruar dhjetëra të punësuar, ndërsa në deklarimin e fundvitit ka paraqitur vetëm dy të punësuar. Disa ekspertë nuk gëzojnë dokumentacion përkatës, ndërsa kompania përvojën më të madhe e ka në prodhimin e veshjeve të brendshme. Edhe pse kompania italiane është bartëse e mbikëqyrjes, “Elekstrasollushëns” është kompania përmes së cilës do të kalojë shuma më e madhe e 22.3 milion eurove të parapara për konsulentët. Kjo kompani ndodhet në një adresë me kompanitë të cilat nuk arritën të sigurojnë garanci bankare gjatë tenderit të parë për shkak se paratë e tyre ndodheshin në bankat ruse.

“Evrokonsallting”, e themeluar nga Branisllav Dimitrijeviq, me drejtues aktual Zoran Dimitrijeviq do të jetë kompania tjetër e angazhuar në mbikëqyrje. Kjo kompani pronari i së cilës ndiqet penalisht në Armeni për mashtrim, fitoi pjesë nga kulaçi milionësh për mbikëqyrje, pavarësisht se Qeveria ishte në dijeni për të kaluarën e errët të Dimitrijeviq, mos qasjen e tij për organet ligj-zbatuese në vendin tonë dhe dyshimet për manipulime me pronësi të kompanisë me qëllim përshtatjen e kushteve për pjesëmarrje në tender. Qeveria dhe Ndërmarrja Publike “Rrugët Shtetërore” në vend që të distancohen nga këto rrethana, dolën në mbrojtje të kompanisë dhe imazhit të saj.

“EPTISA”, është një mollë tjetër sherri që bëri Qeverinë të pendohet për një vendim të marrë. Kompania spanjolle ishte dënuar nga organi ekzekutiv në nëntor të vitit 2020, duke iu ndaluar çdo komune dhe institucioni shtetëror bashkëpunimi me firmën “EPTISA” në projekte me vlera mbi 1.000.000 euro. 10 javë më vonë, e gjetur para mundësisë për t’u paditur për shkelje të marrëveshjes dhe e zënë ngushtë para aktit të kryer se organi ekzekutiv nuk mund të sjell vendim nëse një subjekt vepron në kundërshtim me ligjin ose jo, Qeveria tërhoqi mbrapa vendimin, përkatësisht abrogoi urdhrin për mosbashkëpunim.

U zgjat afati në tender dhe u ndryshuan edhe kushtet për pjesëmarrje duke ua lehtësuar dhe duke u mundësuar pjesëmarrjen në mbikëqyrje dhe konsulencë edhe kompanive me bilanc negativ në vitin e fundit. Të gjitha këto dëshmi të shpalosura nga mediat dhe të detektuara nga Prokuroria për Ndjekjen e Krimit të Organizuar dhe Korrupsionit krejt në fund edhe atë përmes zërave në opinion, nuk ndikuan aspak në kahjen e Qeverisë. Përkundrazi, organi ekzekutiv me eksponentët promotorë të këtij projekti, sipas tyre historik, nuk hezituan që kritikuesit e këtij projekti t’i shpallin armiq. /Alsat.mk