Hulumtimi: Ka më shumë diabetikë në botë sesa mendohej, gjysma e tyre nuk trajtohen

Më shumë se 800 milionë të rritur në mbarë botën kanë diabet – dyfishi i shifrave të sugjeruara më parë, dhe më shumë se gjysma e tyre të moshës 30 vjeç e lart janë të patrajtuar, ka zbuluar një studim i ri.

Në vitin 2022, kishte rreth 828 milionë njerëz mbi moshën 18 vjeç me diabet tip 1 dhe tip 2 në mbarë botën, sipas një studimi të botuar në revistën The Lancet. Ndër të rriturit mbi 30 vjeç, 445 milionë ose 59 për qind e tyre nuk marrin trajtim, theksojnë autorët.

Organizata Botërore e Shëndetësisë (OBSH) vlerësoi më parë se rreth 422 milionë njerëz në mbarë botën kanë diabet, një sëmundje kronike metabolike që përfshin nivele të larta të sheqerit në gjak që mund të dëmtojë zemrën, enët e gjakut, nervat dhe organet e tjera nëse nuk trajtohet.

14 për qind e pacientëve

Shkalla globale e diabetit është dyfishuar që nga viti 1990 nga rreth 7 përqind në 14 përqind, tha studimi, i nxitur kryesisht nga një rritje e rasteve në vendet me të ardhura të ulëta dhe të mesme.

Por edhe pse ka shumë më tepër raste në ato vende, normat e trajtimit mezi janë rritur, thonë autorët, ndërsa gjërat janë përmirësuar në disa vende me të ardhura më të larta – duke çuar në një hendek të zgjeruar trajtimi.

Në pjesë të Afrikës Sub-Sahariane, vetëm 5 deri në 10 përqind e atyre që vlerësohet se kishin diabet po trajtoheshin, tha Jean Claude Mbanya, një profesor në Universitetin e Yaounde I në Kamerun. Trajtimi i diabetit, qoftë me insulinë apo me ilaçe, mund të jetë i shtrenjtë.

“Një numër i madh njerëzish janë në rrezik të komplikimeve të rënda shëndetësore”, tha ai.

Tipi 2 mbizotërues tek të rriturit

Studimi u prodhua nga NCD Risk Factor Collaboration në bashkëpunim me Organizatën Botërore të Shëndetësisë dhe është analiza e parë globale që përfshin vlerësimet e shkallës së sëmundjes dhe trajtimit. Ai bazohet në më shumë se 1000 studime që mbulojnë më shumë se 140 milionë njerëz, thonë autorët.

Edhe pse studimi nuk i ndau rastet e diabetit të tipit 1 dhe tipit 2, provat e mëparshme sugjerojnë se shumica e diabetit tek të rriturit është tipi 2, i cili lidhet me obezitetin dhe dietën e dobët, thanë autorët.