Implanti i ri i trurit për personat e verbër dhe me shikim të dobët – jep shpresë për të parë përsëri

Përparimet në teknologji hapin dyert për mundësi të reja për personat me shikim të dëmtuar. Studiuesit në Universitetin e Freiburgut, të udhëhequr nga Dr. Maria Asplund, kanë zhvilluar një implant miniaturë të trurit për shikimin, të pajisur me elektroda në madhësi të një neuroni, që mund t’u japë të verbërve shpresën për të parë përsëri. Implantet e vizionit janë të pranishme në mjekësi që nga mesi i viteve nëntëdhjetë të shekullit të kaluar, por metodat e mëparshme kishin kufizime për shkak të madhësisë së elektrodave dhe korrozionit të metaleve.

Inovacioni në implantet e reja të trurit qëndron në elektrodat mikroskopike, të cilat lejojnë vendosjen e një numri më të madh elektrodash në një implant të vetëm. Kjo mundëson stimulim më të detajuar të trurit, duke krijuar një pamje më të qartë për pacientët. Rëndësia e detajeve është thelbësore sepse imazhi që truri krijon përmes këtyre sinjaleve nuk është aq i mprehtë sa tek njerëzit me shikim të pa dëmtuar. Gjithashtu, implanti përdor një përzierje të veçantë materialesh me bazë polimeri që parandalon korrozionin dhe në këtë mënyrë zgjeron qëndrueshmërinë dhe funksionalitetin.

– Tani e dimë se është e mundur të bëhen elektroda të vogla sa një neuron (qelizë nervore) dhe ta mbajmë këtë elektrodë të funksionojë me efikasitet në tru për një kohë të gjatë. Hapi tjetër do të jetë krijimi i një implanti që mund të lidhet me mijëra elektroda – thotë Maria Asplund, udhëheqëse e projektit dhe bashkëautore e studimit, e cila është gjithashtu drejtuese e grupit kërkimor për mikroteknologjinë bioelektronike në Universitetin e Freiburgut.

Sipas hulumtimeve, kjo qasje e re premton qëndrueshmëri dhe efikasitet. Testet fillestare të kryera te minjtë treguan se implanti i trurit mund të stimulojë në mënyrë efektive perceptimin vizual duke përdorur një sasi minimale të energjisë elektrike.

Përparimet në fushën e neuroteknologjisë premtojnë përparime revolucionare në trajtimin e kushteve të ndryshme neurologjike, duke përfshirë ato që më parë ishin të pamundura ose të vështira për t’u trajtuar, si dëmtimet e ndryshme të dëgjimit dhe sëmundja e Alzheimerit.