Industria britanike e makinave në nivelin më të ulët në 70 vjet
Prodhimi i automjeteve në Mbretërinë e Bashkuar ka rënë në nivelin më të ulët në shtatë dekada, kryesisht për shkak të një orari të pafavorshëm festash dhe pasigurisë mbi tarifat, raporton Wards Auto.
Sipas të dhënave nga Shoqata e Prodhuesve dhe Tregtarëve të Motorëve (SMMT), vetëm 59,203 automjete u prodhuan në Mbretërinë e Bashkuar në prill – shifra më e ulët mujore që nga viti 1952, me përjashtim të disa muajve gjatë pandemisë së vitit 2020.
Prodhimi në prill ra me 15.8% krahasuar me të njëjtën periudhë të vitit të kaluar. Konkretisht, prodhimi i makinave të pasagjerëve ra me 8.6% në 56,534 automjete, ndërsa prodhimi i automjeteve komerciale ra ndjeshëm me 68.6% në vetëm 2,669 njësi. “Wards” ia atribuon këtë rënie mbylljes së një fabrike, si dhe “normalizimit të kërkesës” pas bumit pas pandemisë.
Disa faktorë kontribuan në këto rezultate të dobëta. Pashkët, të cilat ranë në prill të këtij viti, shkurtuan numrin e ditëve të punës. Përveç kësaj, kalimi në modele të reja kërkoi një ndalesë të përkohshme të prodhimit për shkak të modifikimeve në linjat e prodhimit – të cilat reduktuan më tej prodhimin e përgjithshëm. Megjithatë, problemi më i madh mbeten tarifat e automjeteve në SHBA, të cilat aktualisht arrijnë në 10% për deri në 100,000 automjete në vit.
Drejtori ekzekutiv i SMMT, Mike Howes, tha se Mbretëria e Bashkuar po përjetonte “gjysmën e parë më të vështirë të vitit në prodhim” që nga viti 2009, kur ekonomia ende po ndjente efektet e krizës financiare.
Hawes shtoi: “Nevojitet veprim urgjent për të stimuluar kërkesën e brendshme dhe për të rritur konkurrueshmërinë ndërkombëtare. Qeveria ka njohur rolin kyç të industrisë së makinave në ekonominë britanike, duke negociuar me sukses kushte të përmirësuara tregtare me SHBA-në, BE-në dhe Indinë vetëm brenda një muaji.”
Pavarësisht pasigurisë rreth tarifave, Evropa mbetet tregu kryesor i eksportit të Mbretërisë së Bashkuar. Dërgesat në kontinent ranë me 19.1% në prill, por ende përbëjnë më shumë se gjysmën e totalit të eksporteve. Numri i automjeteve të dërguara në SHBA ra me 2.7% në të njëjtën periudhë. Nga ana tjetër, eksportet në Kinë dhe Turqi u rritën përkatësisht me 44% dhe 31.2%.
“Për të shfrytëzuar këto mundësi tregtare, ne duhet të sigurojmë investime shtesë, të cilat do të varen nga konkurrueshmëria dhe besimi që mund të ofrojë një strategji industriale gjithëpërfshirëse dhe inovative afatgjatë”, tha Howes. “Nëse e arrijmë këtë, vendet e punës, rritja ekonomike dhe dekarbonizimi do të përhapen në të gjithë Mbretërinë e Bashkuar.”
