Interi kërkon fitoren ndaj Udinezes, për të harruar disfatën në derbin e Milanos

Pasi u mposht në derbin lokal nga Milani, kampioni në fuqi i Italisë, Interi, synon të kthehet te fitorja në Serie A. Interi të shtunën nga ora 15:00 luan në udhëtim ndaj Udinezes në përballjen e xhiros së gjashtë të kampionatit italian.

Interi nuk ka nisur më së miri mbrojtjen e titullit. Në pesë ndeshje mblodhi vetëm tetë pikë. Udinese ka shfaqur më shumë deri më tani. I ka dhjetë pikë. Kështu që ndeshja e së shtunës nuk do të jetë aspak e lehtë për Interin.

Edhe Udineze pësoi në xhiron e kaluar, madje me rezultatin e thellë, 3:0, nga Roma. Të shtunën janë edhe dy ndeshje të tjera. Nga ora 18:00 takohen Genoa e Juventusi. Me shumë interes pritet edhe takimi Bolonja – Atalanta, që fillon në ora 20:45. Bëhet fjalë për dy skuadrat që luajnë në Ligën e Kampionëve.

Torino – Lacio është ndeshja e parë e së dielës, që zhvillohet nga ora 12:30. Prej orës 20:45, Napoli e pret Monzan.