Izraeli njofton për tërheqjen e mijëra trupave nga Gaza
Izraeli njofton për tërheqjen e mijëra trupave nga Gaza
Mijëra ushtarë izraelitë po zhvendosen nga Rripi i Gazës, tha ushtria më 1 janar. Kjo është shenja e parë e një tërheqjeje të konsiderueshme të trupave nga Izraeli që nga fillimi i luftës, përderisa forcat izraelite vazhduan të sulmojnë qytetin kryesor në jug të enklavës.
Lajmi për uljen e numrit të trupave erdhi para vizitës në rajon të sekretarit amerikan të Shtetit, Antony Blinken. Vizita e kryediplomatit në Lindjen e Mesme do të zhvillohet pasi administrata e presidentit Joe Biden, kaloi në Kongres shitjen e armëve për Izraelin.
Përmes një deklarate, ushtria tha të hënën se pesë brigada, apo disa mijëra trupa, do të largohen nga Gaza në javët në vijim për trajnime dhe pushim. Të dielën, zëdhënësi i ushtrisë, Daniel Hagari, bëri njoftimin e parë të shkurtër për tërheqjen e trupave, por pa specifikuar se për sa trupa bëhet fjalë apo nëse ky vendim nënkupton se Izraeli po nis një fazë të re të luftës.
“Objektivat e luftës kërkojnë luftime të gjata dhe ne po përgatitemi në përputhje me këtë”, tha ai.
Izraeli është zotuar se do të shkatërrojë aftësitë ushtarake dhe qeverisëse të Hamasit, i cili nxiti luftën pas sulmeve të 7 tetorit në jug të Izraelit, kur grupi radikal vrau 1.200 persona dhe mori peng afër 240 të tjerë.
Izraeli u kundërpërgjigj fuqishëm me një ofensivë tokësore, ajrore dhe detare që deri më tani ka marrë jetën e mbi 21.800 personave në Gazë, sipas Ministrisë së Shëndetësisë në territorin e kontrolluar nga Hamasi. Megjithatë, kjo ministri nuk bën dallimin mes civilëve të vrarë dhe luftëtarëve të Hamasit. Izraeli ka thënë se mbi 8.000 luftëtarë të Hamasit janë vrarë, por nuk ka dhënë dëshmi për këto pretendime./Rel
