Kardiologët rekomandojnë një aktivitet të shkurtër për një zemër të shëndetshme

Fakti është se të ecësh shumë çdo ditë është e shëndetshme, por ndonjëherë mjafton të caktosh një sasi minimale kohe për t’u kujdesur për shëndetin tënd. Për shembull, vetëm pesë minuta. Po, vetëm pesë minuta janë të mjaftueshme për të filluar të jetoni një jetë më të mirë dhe të kujdeseni për shëndetin e të gjithë trupit tuaj.

Një grup kardiologësh i thanë portalit Parade se aktiviteti i shkurtër fizik që zgjat vetëm pesë minuta mund të ndihmojë. Sigurisht, një aktivitet kaq i shkurtër nuk do t’i fshijë pasojat negative të një stili jetese sedentar ose të një diete të pashëndetshme, por mjekët theksojnë se edhe zakonet e vogla mund të kenë një ndikim të madh nëse praktikohen rregullisht.

Kardiologët e Parade veçuan një shëtitje të shkurtër si një aktivitet të dobishëm për shëndetin. Dr. Shan Khurshid paralajmëron për rreziqet e të qëndruarit ulur për një kohë të gjatë dhe thekson: “Një mënyrë jetese sedentare rrit rrezikun e sëmundjeve të zemrës, madje edhe tek ata që ushtrohen rregullisht.” Ai beson se është e rëndësishme të gjesh kohë gjatë ditës për lëvizje më të shkurtra, jo vetëm për stërvitje të gjata.

Dhe profesoresha e kardiologjisë, Dr. Erika Spetz, thekson se pesë minuta aktivitet fizik mund të kenë një efekt pozitiv jo vetëm në trup, por edhe në mendje.

“Gjatë ditës së punës, midis takimeve, dal për një kafe ose thjesht dal për një shëtitje. Nëse nuk mund të dal nga zyra, bëj disa ushtrime të thjeshta pas tavolinës sime. Në shtëpi, e çoj qenin për një shëtitje të shkurtër”, shpjegon ajo.

Ecja e rregullt përmirëson qarkullimin e gjakut, ul presionin e gjakut dhe kolesterolin e keq (LDL) dhe zvogëlon rrezikun e diabetit të tipit 2 dhe obezitetit. Ecja është gjithashtu e mirë për trurin. Spetz thekson se aktiviteti fizik ndihmon në rregullimin e sistemit limbik, i cili është përgjegjës për emocionet.

“Kur sistemi limbik është në ekuilibër, ne marrim vendime racionale më lehtë. Kjo është e paçmuar, qoftë në punë apo në shtëpi”, shton ajo.

Ekspertët rekomandojnë që të ecni për ato pesë minuta me një ritëm të shpejtë, domethënë mjaftueshëm intensiv sa të shpejtoni frymëmarrjen, por prapëseprapë të jeni në gjendje të thoni fjali të shkurtra. Ky ritëm përshpejton rrahjet e zemrës dhe përmirëson qarkullimin e gjakut.

Për ata që mendojnë se nuk kanë kohë për të lëvizur, Dr. Spetz ka disa këshilla praktike: “Në vend të takimeve që zgjasin një orë, caktoni ato për 45 minuta. Përdorni 15 minutat e mbetura për të ecur. Kolegët tuaj do t’ju falënderojnë dhe ju do të bëni diçka të mirë për shëndetin tuaj.”

Dr. Khurshidi u pajtua, duke shtuar se edhe një telefonatë mund të jetë një mundësi për të bërë një shëtitje, e tëra çfarë duhet të bësh është të çohesh dhe të lëvizësh.