Këshilli i Prokurorëve Publikë me dyer të mbyllura vendos për shkarkimin e Kocevskit

Këshilli i Prokurorëve Publikë me dyer të mbyllura vendosi të jap mendim negativ për propozimin e Qeverisë për shkarkimin e kryeprokurorit Lupço Kocevski. Në fillim të seancës, dy prokurorë kërkuan përjashtimin e publikut, për të ruajtur integritetin e prokurorit publik dhe për shkak të ndjeshmërisë së të dhënave që përmban propozimi. Pavarësisht vendimit të sotëm të Këshillit të Prokurorëve, Qeveria ka paralajmëruar se procedura për shkarkimin e Kocevskit do të ndërpritet. Kjo kthesë erdhi pas tragjedisë në Koçan. Kryeministri Mickoski tha se fokusi duhet të jetë në zbardhjen e shkaqeve të tragjedisë dhe se në këtë moment ky është prioriteti më i lartë për organet hetuese.

“Anëtarët e këshillit duke e shqyrtuar propozimin e Qeverisë lidhur me shkarkimin e prokurorit publik mori vendim me shumicë votash të anëtarëve të këshillit dhe jep mendim negativ lidhur me propozimin për shkarkim. Këshilli do ta përpilojë mendimin në afatin ligjor dhe do ta dorëzojë në Qeveri. Publiku u përjashtua me propozim të anëtarit të këshillit që u pranua njëzëri nga ana e anëtarëve të tjerë dhe me shumicë prej dy të tretave publiku u përjashtua me qëllim të ruajtjes së reputacionit dhe integritetit të prokurorit publik si dhe mbrojtjen e të dhënave që ishin në dëshmitë që prokurori publik i dorëzoi së bashku me prononcimin lidhur me propozimin. Diskutimi i plotë i anëtarëve të këshillit do të publikohet në procesverbalin në faqen e internetit të Këshillit dhe opinioni do të ketë qasje në diskutimin e komisionit”, tha Dushica Dimitrievska, Kryetare e Këshillit të Prokurorëve. /Alsat.mk