Ky qytet do të bëhet shtëpia e ndërtesës më të lartë banesore në botë: Apartamenti më i vogël do të kushtojë 5 milionë dollarë
Një ndërtesë e re në Balneario Camboriu, Brazil, do ta tejkalojë Kullën Central Park të Nju Jorkut si ndërtesa më e lartë rezidenciale në botë, dhe apartamenti i saj më i lirë do të kushtojë 5 milionë dollarë.
Kulla Senna, që thuhet se është frymëzuar nga jeta e legjendës së Formula 1, Ayrton Senna, do të ndërtohet mbi vendpushimin luksoz bregdetar brazilian të Balneario Camboriu, duke u ngritur më shumë se 550 metra në ajër – pak më e lartë se One World Trade Center në Nju Jork.
Investitorët në projektin 154-katësh zbuluan së fundmi çmimet e reja për rezidencat më ekskluzive të kullës, raportoi Newsflash, dhe shifrat janë të pabesueshme.
Kompleksi i shtrenjtë do të përfundojë me dy apartamente me tre kate, secila me një çmim marramendës prej 53 milionë dollarësh. Çmimet e reja përfaqësojnë një rritje dramatike nga vlerësimi fillestar prej 15.92 milionë dollarësh. Ato thuhet se do të shiten nga shtëpia britanike e ankandeve Sotheby’s.
Mbesa e Sennës, artistja Lalali Senna, ndihmoi në projektimin e kullës, e cila thuhet se simbolizon udhëtimin e ikonës së sporteve motorike përmes kapërcimit të sfidave.
Kulla Sena po ndërtohet për të pasur gjithsej 228 njësi, duke përfshirë 204 apartamente, dhe madje edhe rezidencat më të vogla në kullë do të kushtojnë afër 5 milionë dollarë.
Projekti është rezultat i një bashkëpunimi midis kompanisë së ndërtimit “FG Emprendimentos”, familjes Sena dhe tregtarit brazilian Havan. Investimi i vlerësuar është më shumë se 525 milionë dollarë.
Ndërtimi pritet të përfundojë deri në vitin 2033.
