Majami e Feniks, shënojnë fitoret e parë në raundin e dytë

Majami Hit e ka nisur mirë raundin e dytë të ‘Play Off’ në NBA, njësoj sikurse edhe skuadra e Feniks Sansit. Skuadra e Majamit ka mposhtur Filadelfian me rezultatin 106:92, në përballjen e parë. Më efikas te skuadra e Majamit ishte Tajler Hero, i cili shënoi 25 pikë, ndërsa në radhët e Filadelfisë u dallua Tobias Harris me 27 pikë.

Në ndeshjen tjetër, përkundër 45 pikëve të Luka Donçiçit, skuadra e tij, Dallas Maveriks, pësoi humbje ndaj Feniks Sans, me rezultat 114:121. Donçiç përpos 45 pikëve, regjistroi edhe 12 kërcime dhe 8 asiste. Në radhët e Feniks Sans shkëlqeu Devin Buker, me 23 pikë, 9 kërcime dhe 8 asiste.

Majami Hit shkon në 1:0 në serinë ndaj Filadelfisë, si edhe Feniks Sans ndaj Dallas Maveriksit.