Maks Verstapen shpreson të rigjejë fitoren në pistën e Monza-s

Gara e fundit e Formula 1 në Holandë ishte një zhgënjim për pilotin vendës Maks Verstapen, që u “mjaftua” me vendin e dytë. Por problem më i madh ishte se ai e mbylli garën 20 sekonda pas Lando Norris me MekLarenin. Kjo diferencë kaq e madhe nuk i pëlqen Verstapenit, që ka ende 70 pikë avantazh ndaj britanikut në klasifikimin e përgjithshëm.

“Unë mendoj se kjo ishte thjesht një fundjavë e keqe në përgjithësi. Nuk më pëlqen kjo diferencën me Norris, ndaj duhet të kuptojmë pse. Garat e fundit nuk kanë qenë fantastike. Kjo situatë është paksa alarmante, por ne e dimë se nuk duhet të kemi panik”, tha më tjerash 3 herë kampioni i botës.

 

“Ne duhet të përpiqemi të përmirësojmë situatën. Dhe kjo është ajo për të cilën ne po punojmë edhe pse Formula 1 është shumë e komplikuar”, tha më tej holandezi i Red Bull Racing, që nuk fiton prej 5 garash.

Verstapen shpreson të rigjejë fitoren në pistën e Monza, ku dhe ka disa risi.

“Në Monza do të ketë asfalt të ri, bordura të reja dhe gjithashtu një modifikim në kthesën e parë të dyfishtë. E dimë që kemi shumë punë për të bërë,” tha në fund Verstapen.

LEXO EDHE:

Back to top button