Mali i Zi është vendi më i përparuar në Ballkanin Perëndimor në negociatat me Bashkimin Evropian, ndërsa viti 2028 po përmendet si objektiv i mundshëm për anëtarësimin. Komisioni Evropian beson se negociatat mund të përfundojnë në vitin 2026, pas së cilës do të vijojnë hapat drejt anëtarësimit të plotë.
Presidentja e Komisionit Evropian, Ursula von der Leyen, tha se Brukseli e sheh Malin e Zi si anëtar të ardhshëm të BE-së deri në vitin 2028. Ajo njoftoi edhe udhërrëfyes të rinj për vendet kandidate më të përparuara.
Mali i Zi ka hapur të 33 kapitujt e negociatave, ndërsa 18 prej tyre janë mbyllur përkohësisht. Në prill, Këshilli i BE-së krijoi një grup pune për përgatitjen e traktatit të pranimit të Malit të Zi.
Ministri i Jashtëm, Ervin Ibrahimovic, tha se vendi duhet të zbatojë reformat, të ulë tensionet politike dhe çështjet e pazgjidhura t’i trajtojë përmes dialogut. Komisioni Evropian thekson se përparimi mbetet i kushtëzuar nga përmbushja e kritereve dhe zbatimi i reformave.
Perspektiva evropiane ishte në fokus edhe të takimit të ministrave të jashtëm në kuadër të Procesit të Berlinit në Budva. Ministri gjerman Johann Wadeful tha se procesi i gjatë i anëtarësimit po rrit zhgënjimin te të rinjtë dhe po nxit emigrimin.
Megjithatë, viti 2028 nuk është një datë e garantuar. Mali i Zi duhet të përfundojë negociatat, të përmbushë kushtet, të miratojë dhe ratifikojë traktatin e pranimit dhe të marrë miratimin e të gjitha shteteve anëtare.
Për momentin, 2028 mbetet një objektiv politik, ndërsa Mali i Zi vazhdon të jetë vendi më i avancuar i Ballkanit Perëndimor në rrugën drejt BE-së.
