Mbi 3 milionë tonë drithëra ukrainase u dërguan përmes portit të Konstancës të Rumanisë në tremujorin e parë

Rreth 3.3 milionë tonë drithëra nga Ukraina u transportuan përmes portit rumun të Konstancës, në Detin e Zi, në tremujorin e parë të këtij viti, tha autoriteti portual për Reuters.

Në vitin 2022, 8.6 milionë tonë drithë ukrainase u transportuan përmes Konstancës, me tren, kamion dhe maune në lumin Danub. Në përgjithësi, porti rumun trajtoi rreth 24 milion ton eksporte gruri vitin e kaluar.

Për të lehtësuar transportin e drithërave në mes të luftës në Ukrainë, kompania shtetërore hekurudhore e Rumanisë CFR ka rehabilituar linjat hekurudhore në port. Kompania i tha Reuters se, në vitin 2022, ajo kishte rihapur ose rehabilituar 47 linja hekurudhore mallrash dhe pasagjerësh që lidhin Rumaninë me Ukrainën dhe Moldavinë.

Megjithatë, Reuters thotë se “miliona ton drithëra ukrainase – më të lira se ato që prodhohen në BE – ende përfunduan në vendet fqinje, për shkak të pengesave logjistike dhe distancave më të shkurtra”.

Situata ka zemëruar fermerët në rajon, përfshirë Rumaninë, të cilët janë të pakënaqur me zgjidhjet e Komisionit Evropian për çekuilibrat e shkaktuar nga fluksi i drithit nga Ukraina.

Fermerët organizuan protesta në Rumani, ndërsa kryeministrat e Polonisë, Hungarisë, Rumanisë, Bullgarisë dhe Sllovakisë i dërguan një letër presidentes së Komisionit Evropian Ursula von der Leyen duke thënë se tarifat mund të kenë nevojë të rifuten për të mbrojtur fermerët në BE.