McConaughey: Rezistenca ndaj inteligjencës artificiale nuk do të zgjasë shumë – “shumë para janë në lojë”

“Nuk do të jetë e mjaftueshme të qëndrosh mënjanë dhe të argumentosh moralisht se është gabim. Kjo nuk do të zgjasë. Ka shumë para në lojë dhe teknologjia është shumë produktive”, beson aktori.

Aktori fitues i çmimit Oscar, Matthew McConaughey, beson se rezistenca ndaj zhvillimit të inteligjencës artificiale nuk do të zgjasë shumë, pasi është një industri në të cilën “përfshihen shuma të mëdha parash”, raporton “Vijesti.me”.

Duke iu përgjigjur një pyetjeje në lidhje me ndikimin në rritje të inteligjencës artificiale, McConaughey theksoi se prania e “IA-së” është tashmë e pashmangshme.

Ai këshillon që zëri, imazhi dhe gjithçka tjetër duhet të mbrohen me një markë tregtare.

“Bëj çfarëdo që të duhet, në mënyrë që askush të mos të ‘vjedhë’ kur të vijë ajo kohë”, shtoi McConaughey.

Komentet e tij vijnë pasi Wall Street Journal raportoi se ai ka marrë miratimin nga Zyra e Patentave dhe Markave Tregtare e SHBA-së për tetë aplikime për markë tregtare. Materialet e mbrojtura përfshijnë klipe të shkurtra video dhe një regjistrim audio të vargut të tij legjendar “Alright, alright, alright” nga filmi “Dazed and Confused”.

Mbrojtja përfshin, ndër të tjera, një video shtatësekondëshe të tij duke qëndruar në një verandë, një klip tre-minutësh para një peme Krishtlindjesh, si dhe klipin audio të lartpërmendur me fjalinë e njohur që është bërë pjesë e kulturës pop.

Pas deklaratave të tij për “AI”, disa në publik vunë në dukje një konflikt të mundshëm interesi. McConaughey zbuloi së fundmi se ka qenë investitor në kompaninë ElevenLabs, e cila zhvillon softuerë për inteligjencë artificiale dhe sintezë të të folurit, për disa vite. Kritikët besojnë se mbrojtja dhe qasja e tij pragmatike ndaj zhvillimit të teknologjisë së inteligjencës artificiale mund të motivohen gjithashtu nga interesa financiare.

Megjithatë, aktori thotë se e ardhmja ka mbërritur tashmë dhe se, në vend të rezistencës, përshtatja dhe mbrojtja ligjore e identitetit të dikujt në epokën dixhitale është thelbësore.