Mexhiti: Shqiptarët do të vazhdojnë të jenë në pushtet, ndërsa BDI do të vazhdojë të jetë në opozitë

Ndërkohë kreu i Lëvizjes Demokratike, pjesë e koalicionit VLEN, Izet Mexhiti duke iu përgjigjur siç e quan ai shou të BDI-së në Kuvend thotë se shqiptarët do të vazhdojnë të jenë në pushtet, ndërsa BDI do të vazhdojë të jetë në opozitë. Mexhiti thekson se koha e BDI-së ka kaluar. Ai i rendit rastet e ndodhura në kohën kur partia e Ali Ahmeti ishte në pushtet. Mexhiti thotë se ndodhi rasti ‘Sopoti’, ndërsa BDI qëndroi në pushtet, njëjtë sikurse edhe për rastin Alfa, vrasjen e Harun Aliut e rastin Monstra. Mexhiti thotë se u vranë komandantë të UÇK-së dhe u dënuan me burg të përjetshëm Sokoli me shokë, ndërsa BDI qëndroi në pushtet. Përmend edhe ‘Durmo tursin’, Spitalin Modular dhe djegien e autobusit të ‘Besa trans’. Mexhiti thekson se asnjëra nga këto tragjedi nuk është zbardhur deri më sot. “Asnjë zyrtar i shtetit nuk ka dhënë dorëheqje për arsye morale ose politike. Askush nuk është thirrur në përgjegjësi para ligjit. Kryeministra kanë qenë Cërvenkovski, herë Buçkovski, herë Gruevski, herë Zaevi, herë Dimitrovski, herë Kovaçevski. E BDI – ka vazhduar të qëndrojë e heshtur në pushtet”, reagon Mexhiti. /Alsat.mk