Michelle Obama për përkrahjen që ia dha bashkëshortit, Barackut, para suksesit të tij financiar

Duke kujtuar ditët e para të romancës së tyre, ish-zonja e parë e SHBA-së, Michelle Obama ka treguar se si e mbështeti bashkëshortin, ish-presidentin amerikan Barack Obama, përpara se ai të arrinte sukses financiar.

61-vjeçarja, ka folur në podcastin e saj IMO,  bashkë me vëllain e saj dhe bashkëprezantuesin Craig Robinson, duke me krijuesin e podcastit On Purpose, Jay Shetty, mbi paratë dhe marrëdhënien, ka raportuar FemaleFirst.

Kur Craig e pyeti: “A do të të tërhiqte një burrë që nuk është i qëndrueshëm financiarisht kur e takon?” Michelle u përgjigj: “Uh, unë u martova me një të tillë”.

“Lashë firmën time kur takova Barackun. Kisha dikë që më tha: ‘Unë të mbështes. Rreziqet që mendon se po merr, nuk janë aq të çmendura dhe unë jam këtu për të të ndihmuar’. Atëherë i thashë vetes, ‘Do të preferoja të kem një partner që është gati të përballet me sfida me mua, sesa dikë me të ardhura më të larta”, ka treguar Michelle.

Ajo ka shtuar se e dinte qe do t’i duhej të jetë e gatshme të përballej edhe vet me sfida.

“Por kjo do të thoshte që edhe unë vet duhej të isha gati të përballesha me sfida bashkë me të”, ka thënë tutje Michelle.

Çifti Obama janë njohur në vitin 1989 kur Michelle ishte 25 vjeçe dhe Baracku 28 vjeç, teksa të dy punonin në firmën ligjore “Sidley Austin LLP” në Chicago.

Brenda një muaji nga njohja e tyre, Barack e ka ftuar në takim dhe u fejuan në vitin 1991. Një vit më vonë u martuan dhe më pas mirëpritën dy vajzat e tyre, Malian në 1998 dhe Sashan në 2001.

Karriera politike e Barackut nisi seriozisht në vitin 2004 kur u zgjodh senator i Illinoisit, duke e sjellë familjen në qendër të vëmendjes publike. Në vitin 2008, ai u bë presidenti i 44-të i Shteteve të Bashkuara dhe u rizgjodh në vitin 2012.

Michelle pati pranuar se rruga e tyre nuk ka qenë gjithmonë e lehtë.

Duke folur në Revolt TV në muajin dhjetor të vitit 2022, ajo pati thënë se kishte përjetuar momente të vështira në martesë, sidomos gjatë viteve të para të prindërimit.

“Nuk e duroja dot Barackun kur vajzat tona ishin të vogla, sepse ndieja sikur unë mbaja të gjithë barrën ndërsa të dy punonim për karrierat tona. Martesa nuk është kurrë 50/50. Ndonjëherë unë jap 70 për qind dhe ai 30 për qind, por a e dini çka? Jemi të martuar që 30 vjet. Do të pranoja 10 vjet të këqija për 30 vjet së bashku”, pati thënë ajo.

Kohët e fundit, çifti është përballur me spekulime mbi martesën e tyre, veçanërisht pasi Barack mori pjesë i vetëm në funeralin e ish-presidentit Jimmy Carter dhe në inaugurimin e presidentit Donald Trump.

Megjithatë, Page Six ka raportuar se Michelle thjesht “është tërhequr” nga jeta e saj e publike në Washington DC, duke theksuar se çifti vazhdon ta ruajë një marrëdhënie të fortë.