Mickoski: Nuk ka baza që Artan Grubi të fitojë azil politik

Gazetare: Fatlume Dervishi

Kryeministri Hristijan Mickoski nuk pret që ish-zëvendëskryeministri i arratisur Artan Grubi të marrë azil politik në ndonjë nga shtetet e rajonit, sepse, pas vendosjes së tij në listën e zezë, thotë se është e qartë se Grubi dyshohet për vepra kriminale. Sipas Mickoskit, procesi kundër Grubit nuk ka prapavijë politike.

“Për shkak të atij dyshimi të bazuar për vepër kriminale, prokuroria ka nisur hetime ndërsa gjykata siç jam i informuar, ka caktuar paraburgim në kohëzgjatje prej 30 ditësh. Pra, këtu nuk po flasim për arsye politike, por padyshim ka diçka ndryshe nga politika, pra ekziston dyshimi i bazuar për krim të kryer. Nuk pres që të ndodhë, por gjithsesi është vendim i atyre që do të hynin në procedurë të tillë”, deklaroi Hristian Mickoski kryeministër.

Opozita sërish e drejtoi gishtin kah paria në pushtet duke theksuar se Grubi ka ikur me ndihmën e VMRO-DPMNE-së.

“VMRO-ja duhet të tregojë se cila është marrëveshja politike dhe çmimi për lirimin e Grubit? Pse heshtin VMRO-DPMNE dhe Toshkovski për faktin se “rastësisht” nuk funksionuan kamerat, “rastësisht” policia nuk dinte kë duhet të kontrollonte, “rastësisht” kufitari, kuadër i Toshkovskit, gaboi. Kufiri me Kosovën, që kur VMRO-DPMNE-ja është në pushtet, u konfirmua se është kanali kryesor për arratisjen e kriminelëve”, tha Bogdanka Kuzeska, zëdhënëse e LSDM-së.

Artan Grubi është larguar nga vendi më 15 dhjetor dhe autoritetet ende nuk bëjnë të ditur nëse kanë informacione se ku ndodhet. Grubi është i dyshuari i dytë për keqpërdorime në Lotarinë Shtetërore. Përveç Grubit, në këtë rast i  përfshirë është edhe ish-drejtori i Lotarisë, Përparim Bajrami, i cili po ashtu është në arrati.

Një javë para aktakuzës së Prokurorisë, Grubi bashkë me gjykatësin e apelit Enver Bexheti u vendos në listën e zezë amerikane bazuar në dyshimet se në këmbim të ryshfetit kanë shpëtuar Sasho Mijallkovin nga burgu.

BDI-ja rikthen memorien duke thënë se kanë qenë ata që kanë propozuar ligj për masat restriktive, për hetime automatike në vend, ndaj personave që hynë në listën e zezë amerikane. Kryeministri përfundimisht hodhi poshtë mundësinë e miratimit të një ligji të tillë.

“Kjo qeveri nuk do të miratojë ligje që janë në kundërshtim me Kushtetutën por gjithmonë do të punojmë në drejtim të normave pozitive ligjore dhe Kushtetutës që për ne janë dy shtylla kyçe. Legjislatura jonë ka të paraparë atë që duhet ta ketë për këto persona. Mendoj se kemi procedura mjaft cilësore në kuadër të sistemit dhe nuk do të ndërmarrim hapa që janë në kundërshtim me Kushtetutën sepse nuk është ajo arsyeja për të cilën qytetarët na votuan”, theksoi Hristian Mickoski kryeministër. /Alsat.mk