Ministri i Jashtëm finlandez do të takojë homologun turk, pas deklaratave të Erdogan

Ministri i Jashtëm i Finlandës, Pekka Haavisto, ka deklaruar se po planifikon të takojë homologun e tij turk, Mevlüt Çavuşoğlu, në takimin e ministrave të Jashtëm të NATO-s në Berlin.

Sipas Haavistos, çështjet duhet të ndërmerren hap pas hapi. Kjo pasi Qeveria turke ka shprehur pikëpamje pozitive për Finlandën në të kaluarën.

Deklarata e tij erdhi pasi, presidenti turk, Recep Tayyip Erdogan, tha se nuk e sheh aplikimin e Finlandës dhe Suedisë në NATO si një “mendësi pozitive”.

“Ne nuk e shohim pozitivisht anëtarësimin e tyre në NATO”.

Gjatë një prononcimi për mediat, Erdogan deklaroi se vendet skandinave janë bërë një strehë e sigurt për terrorizmin.

“Suedia është bërë një shtëpi për PKK-në dhe grupet e tjera terroriste”.

“Ata, madje, janë anëtarë të parlamentit në disa vende” shtoi ai.

Presidenti turk përmendi shqetësime për ngjarjet në të dy vendet e mbështetësve të militantëve kurdë separatistë që kanë luftuar për autonomi në juglindje të Turqisë për dekada.

Çdo zgjerim i NATO-s kërkon miratimin unanim të anëtarëve të aleancës.

Turqia është anëtare e NATO-s që nga viti 1952.