Џачка : Интересот на државата да биде на прво место на сите партии

Македонија и Албанија, се решени да чекорат една до друга во преостанатиот скрининг процес и отворањето на поглавјата за членство во ЕУ, без да коментираат што ќе се случи доколку земјата навреме не ги спроведе уставните измени. Шефицата на албанската дипломатија Олта Џачка, при официјалната посета на Скопје, рече дека е важно сите политички актери да разберат дека ова е воз што не треба да се пропушти.

„Сметам дека сите политички фактори во државата треба да го имаат на прво место интересот на државата и на граѓаните при секоја одлука што ќе ја донесат. Мислам дека треба да се направат уставни измени и сите да бидат свесни дека со ваква акција ќе го отворат патот за интеграција и просперитет на државата и нејзините граѓани. Што се однесува до нас, чекоревме рамо до рамо во овој процес, постојано бевме координирани и ќе продолжиме да чекориме рамо до рамо во овој процес“, рече Џачка.

Министерот за надворешни работи Бујар Османи, рече дека земјата е благодарна што Албанија никогаш не тактизирала со својата позиција и не лобирала сама да оди напред кога Софија го попречуваше Скопје.

„Мислам дека не е фер да се бара од Албанија дека ако, хипотетички, во ноември не ги постигнеме уставните измени, треба да запре и да не го продолжи процесот, процесот е индивидуален и се заснова на индивидуалната меритократија на државите. Но, сакам да се вратам на она што го нагласи министерката, тоа е неповторлив момент во наметнатата европска динамика на регионот. Министерката рече, војната во Украина, Договорот Косово-Србија, свеста за ЕУ создаваат можност… 2030 година е вистинска можност за двете земји успешно да го завршат овој процес, и јас лично верувам во тоа“, рече Османи.

Османи и Џачка од оваа средба дадоа поддршка за постигнатиот договор меѓу Косово и Србија во Охрид, барајќи од страните да го почитуваат. Меѓу другото, се разговараше и за важноста на соработката на полето на сајбер безбедноста, со оглед на тоа што и двете земји во последниот период беа цел на вакви напади.

Фатлуме Дервиши