ГЕРБ бара оставки од ресорните министри во преодниот кабинет за автобуската несреќа

ГЕРБ го повика претседателот Румен Радев да побара оставка од ресорните министри во преодниот кабинет, како одговорни за несреќата со македонскиот автобус на автопатот „Струма“.

Десислава Атанасова и Александар Иванов од ГЕРБ, на брифинг во партискиот штаб што го пренесуваат бугарските медиуми, изразија сочувство до роднините на загинатите и најавија дека за време на нивните влади биле подготвени планови за поправка на кобната делница и други поправки на автопатот, но тие не биле исполнети од следните влади.

„На овој страшен ден, сметаме дека сите обиди за политички инсинуации и сугестии се непотребни, а изјавите дека причината за несреќата била патот или друг дел од трасата, искажани од градоначалникот на Перник и привремените министри, се длабоко погрешни“, рече Атанасова, која апелираше до сите политичари да сфатат дека изборите се завршени, а меѓусебните обвинувања нема да ги вратат изгубените животи.