Екипата на Далас Маверикс направи голем исчекор напред кон следната фаза во плејофот на НБА. Тимот убедливо победи на гостински терен кај Лос Анџелес Клиперс (123-93) и така обезбедија меч топка пред својата публика.
Човек на натпреварот беше Лука Дончиќ, кој уште еднаш покажа дека е вистинска кошаркарска магија. Словенецот беше неизвесен за овој натпревар затоа што беше повреден и имаше проблеми со коленото, но излезе на терен и одигра феноменално. Доказ за доминацијата на Далас е што домашните гледачи почнаа предвреме да ја напуштаат салата, затоа што од Џорџ, Харден и дружината не го добија она кое го сакаа…
Главниот играч на Далас Маверикс го заврши дуелот со 35 поени, 10 асистенции и седум скока, а доказ за неговата доминација е што имаше дури 20 поени повеќе од вториот стрелец на натпреварот – Клебер со 15 поени.
Кај ЛА Клиперс, Џорџ и Зубац реализираа по 15 поени. Следниот натпревар кој може да го даде победникот во оваа серија е закажан ноќта во петок кон сабота од 3:30 часот.
