Министерот за правда Тупанчевски молчи за унапредувањето на јавни обвинители

Новиот министер за правда Никола Тупанчевски молчи за унапредувањето на јавни обвинители. На еден ден по неговото стапување на функцијата, Советот на јавните обвинители избра нови шефови на скопското и на тетовското обвинителство. Велат дека седницата им била од порано закажана. Алсат испрати прашања до Министерството за правда и го побара ставот на министерот Тупанчевски за следниве прашања:

1. Како ја оценувате одлуката на Советот на јавните обвинители за унапредување на петте јавни обвинители?
2. Дали јавните обвинители кои се унапредени го заслужиле тоа?

Одговор на прашањата не добивме од никого.

Екс-обвинителот од СЈО, Обвинителот Гаврил Бубевски, сега е избран за шеф на скопското обвинителство. Тој моментално застапува три предмети во Кривичниот суд кои ги водеше згаснатото СЈО. Тоа се судењата поврзани со изборните нерегуларности „Титаник“ и „Титаник 2“ со приговорите во ДИК, кои се судат од повторно, како и случајот „Моќник“ каде му се суди на пратеникот на ВМРО – ДПМНЕ, Антонијо Милошоски. Дали Бубевски ќе продолжи да ги застапува овие предмети, ќе одлучи републичкиот обвинител, Љубомир Јовески. Бубевски беше еден од обвинителите и во предметот „Труст“ во кој беше осуден бизнисменот Сеад Кочан и требаше да се вратат испумпаните 17 милиони евра од буџетот за нелегалната зделка во РЕК Битола, но државата никогаш не си ги врати парите.

Бесир Алиу е старо – нов шеф на Обвинителството во Тетово. Тој во телефонски разговор за Алсат се пожали дека работи со малку обвинители.

„Во ОЈО Тетово работиме вкупно тројца јавни обвинители. Сите се трудиме максимално за да немаме застој на предметите. Годишно во просек имаме меѓу 1.300 и 1.500 предмети. Имаме недостиг и на друг кадар неопходен за извршување на дневните работи“, вели Алиу.

Алиу досега беше вршител на должноста, а сега доби и мандат од четири години.

Игор Стефановски