На повеќето граѓани платата им стигнува само за основните трошоци

Месец мај беше доста скап за нашите граѓани. Најмногу пари во последниот месец, односно 19.532 денари биле потребни за храна и пијалоци, а 13.392 за покривање на режиските трошоци за домување. На четиричлено семејство во мај му биле потребни 49.025 денари за да ги покрие минималните трошоци во месецот. Од Сојузот на синдикати на Македонија велат дека најмногу пари од семејниот буџет или 44,3 отсто, се трошат за храна и пијалоци.

„Вкупната синдикална потрошувачка кошница изнесува 44.047 денари, а кога ќе се додадат 4.977 денари или 11,3% за трошоците за живот, односно инфлацијата, таа изнесува 49.024 денари. Просечната исплатена нето-плата по вработен во март годинава изнесува 34.925 денари“, велат од Сојуз на синдикати на Македонија.

Од останатите трошоци кои се дел од синдикалната кошница, 3.720 денари се потребни за превоз, 3.196 денари за хигиена, 2.315 денари за облека, 1.067 денари за култура, додека 821 денар за здравствена заштита. Во споредба со април, потрошувачката кошница во мај беше за околу 5 евра помала. Но, граѓаните велат дека трошоците се неподносливи поради ниските примања што и понатаму ги добиваат.

„Добивам социјална помош од 7 илјади денари, живеам со сопругата, синот, ќерката и внукот. Синот работи приватно и некако преживуваме. Трошоците се зголемени многу, некој вели 20-30%, но дури и над 100% ми се чини дека се зголемени, затоа не сме задоволни“, вели еден граѓанин.

„Платите се ниски, не можеме да излеземе на крај. Сите работи се скапи. Приходот се зголеми за 5-8%, што да правам со 1.000 денари повеќе? Тие за нив си ги зголемија платите за 80 отсто, а работниците останаа со ниски плати. Ако излеземе да се жалиме, не ни дозволуваат да штрајкуваме. Останавме никаде“, додаваат граѓаните.

Податоците покажуваат пораст на инфлацијата. Зголемувањето на трошоците на животот во мај во споредба со мај минатата година изнесува 11,6 отсто, објави Државниот завод за статистика (ДЗС). На месечно ниво има зголемување на трошоците за живот од 0,4%.

„Месечно намалување на трошоците имаше кај маслото за 2,4%, млекото за 1,6% и лебот за 0,7%. Зголемување на индексите на трошоците на животот во мај 2023 година, во споредба со претходниот месец е забележано кај зеленчукот 8,5%, овошјето за 13%, рибата и морските плодови за 1,6%, алкохолните пијалаци за 0,8%, сирењето и урдата за 0,5%, месото за 0,4%, кафето, чајот и безалкохолните пијалаци за 0,2%“, наведуваат од ДЗС.

Инфлацијата се мери според меѓународен стандард, како цена на личната потрошувачка по намена, а Државниот завод за статистика го мери и движењето на малопродажните цени. Според овие податоци, малопродажните цени во мај во однос на истиот месец минатата година се зголемени за 7,5%, додека во мај во однос на април се намалени за 0,9%. За една година храната поскапела за 12,7%.

Аднан Ќаили