Неформалната вечера на балканските лидери во Брисел без многу детали за јавноста
Премиерот Димнитар Ковачевски, неговите колеги од регионот, и еврокомесарот за проширување Оливер Вархеји, учествуваа на неформална лидерска вечера организирана од шефот на ЕУ дипломатијата, Жозеп Борел, во контекст на војната на европскиот континент и без многу детали за јавноста, јави дописничката на МИА од Брисел.
Македонскиот премиер Ковачевски, кусо само се обрати синоќа пред почетокот на вечерата, без прашања од новинарите, за да повтори дека проширувањето кон Западен Балкан и отпочнувањето на преговорите со Северна Македонија, блокирани од Бугарија, се безбедносно прашање за Европа.
-За Северна Македонија ќе разговараме со потпретседателот Борел за потребата од итно отворање на преговорите и одржувањето на првата меѓувладина конференција помеѓу ЕУ и Северна Македонија бидејќи проширувањето на ЕУ не е само економски или политички процес, туку во контекст на новите геополитички настани со војната во Украина, станува прашање на безбедност за Западен Балкан, изјави соноќа Ковачевски.
Од страна на Борел исто така не беа дадени детали за дискусиите кои се одржаа вчера помеѓу шесте премиери и претседатели од регионот, на кои прв пат им се придружи лидерот на Република Српска, Милорад Додик.
