Нема државни пари за лекување на пациентите со цистична фиброза

За да ја преживее болеста цистична фиброза, пациентот мора да зема по 30 таблети дневно, да има 6 инхалации, да консумира 5 оброци и секој ден да има третман со физикална терапија. Но, дополнително на тоа, виталната терапија за оваа ретка болест, која го отежнува функционирањето на органите за дишење и варење, чини стотици илјади евра. Од Здружението за цистична фиброза велат дека над 130 пациенти боледуваат од оваа болест.

Во зависност од фармацевтскиот производител, најевтината терапија за еден пациент во рок од една година е 100.000 евра. Според оваа пресметка, за овие пациенти државата ќе треба да обезбедува најмалку по 13 милиони евра годишно. Според податоците на Клиниката за детски болести, оваа терапија се обезбедува во сите држави од регионот, но кај нас сè уште не се почнати ни разговорите за обезбедување на потребните средства.

Од Фондот за здравство велат дека има само тројца пациенти кои ја примаат терапијата обезбедена преку државата од програмата за финансирање на лекувањето на ретки болести. Ова заболување не е заразно, туку е наследено. За жал, сите пациенти кај нас се деца и млади луѓе./Alsat.mk

Аднан Ќаили