Општините и владата без трошка кохабитација за проблемите
Локалната и централната власт изминативе недели со низа меѓусебни обвинувања чија е вината и кој е надлежен да ги реши проблемите со кои се соочуваат граѓаните настанати од енергетската криза. Состојбата со јавниот превоз, поскапената струја и неизвесноста со парното, се дел од проблемите за кои властите си ја префрлаат топката кој е повеќе надлежен да изнајде решение. Ваквата комуникација уште повеќе ја намалува и така малата доверба на граѓаните кон институциите. Потребен е заеднички пристап за полесно решавање на проблемите, вели аналитичарот Марко Трошановски.
„Оваа комуникација е продолжување на поларизирачката реторика или стил на комуникација помеѓу политичките чинители години наназад којашто доведува до ситуација на силни внатрешни поделби помеѓу населението и огромен пад на довербата во институциите и системот од друга страна. Кај граѓаните се создава чувство на апатија, недоверба и пред сè, немоќ да се справат со ситуацијата и на сериозен начин влијае на кохезијата во општеството.“
Владата побара од Град Скопје и општините во градот да одвојат од буџетот за да може да покријат дел од трошоците за поскапените сметки за парно. Но, градот се прогласи за ненадлежен и одговорноста ја префрли кај централната власт. Изминатава недела и ЈСП побара државна помош за да ги покрие зголемените трошоци поради енормниот раст на цената на метанот. Владата одговори дека надлежен за тоа е Град Скопје. Дури и општините побараа пари од централниот буџет за покривање на дел од сметките за струја, но од Владата засега официјално не им одговорија.
Andrea Çobanova