Почнува учебната година во Грција: Сертификат за вакцинација и брзи тестови како услов за посета на наставата

Под строги здравствени протоколи што предвидуваа документ поврзан со ковид-19, и за учениците и за наставниците и професорите и со задолжителна употреба на маска, од денеска со физичко присуство, почнува новата учебна година во Грција.

За просветните работници, односно за наставниците и професорите, задолжителен е сертификат за вакцинација или потврда за прележан ковид-19 во последните шест месеци или негативен лабораториски тест два пати неделно (секој вторник и петок), а трошоците за тестирањето ќе биде на товар на просветните работници.

Слични се условите и за учениците, односно и за нив ќе биде потребен или сертификат за вакцинација, доколку се постари од 12 години или потврда за прележана болест во последните шест месеци или изјава по направен брз тест, задолжителен два пати неделно (секој вторник и петок).

Како и минатата учебна година, кога по карантинот се отворија училиштата, така и сега, учениците кои не се вакцинирани или се помали од 12 години ќе се тестираат со бесплатни тестови за домашна употреба, односно т.н. селф тестови, кои веќе се достапни во аптеките.

Селф-тестот е задолжителен два пати неделно и учениците ќе треба секој вторник и петок на училиште да носат потврда со негативен резултат од тестирањето направено до 24 часа пред пристигнувањето за да можат да прсуствуваат на настава.