Полскиот Уставен суд ја оспори превласта на ЕУ над полското право

Уставниот суд на Полска одлучи, постапувајќи по прашање од полскиот премиер Матеуш Моравјецки, дека некои членови од основниот договор на Европската унија не се во согласност со полскиот Устав и затоа Полска не мора да почитува некои пресуди на Судот на правдата на ЕУ. „Уставниот суд утврди дека легитимитетот на органите на ЕУ да поставуваат обврзувачки норми во Полска постои само до тој степен до кој полскиот суверен, односно народот, дал согласност. Полското судство му припаѓа на полскиот уставен идентитет. Во врска со тоа никогаш не ѝ било предадено на ЕУ и останува во рамките на ексклузивната надлежност на полскиот законодавен дом“, стои во образложението на пресудата.