Проблеми со градинката во Струга, најдени пари само за 7 воспитувачки и негувателки

И покрај ветувањата дека проблемот ќе се реши, 21 негувателка и воспитувачка од детската градинка во Струга останаа извисени. Нема пари за сите да добијат решенија за работа и да се реши нивниот здравствен и пензиски статус. Од Министерството за труд и социјала за Алсат рекоа дека нашле пари само за седум од нив.

„Врз основа на проверката којашто ја направивме со Министерство за финансии утврдивме дека постојат средства за неколку вработувања. Согласно истото ѝ дадовме насока на Јавната установа Детската градинка повторно да достави барање за обезбедување финансиски средства за вработувања, а министерството веднаш истото ќе го достави до Министерство за финансии“, велат Министерство за труд и социјална политика.

На почетокот на месецов 21 негувателка и воспитувачка престанаа да одат на работа поради нерешениот статус и нискиот хонорар кој кај некои од нив изнесува и под 10.000 денари. Во меѓувреме, деновиве им ветија дека додека не им се реши статусот ќе добиваат плата меѓу 10.000 и 15.000 денари месечно, по што тие се вратија на работа.

„Лицата кои се со договори на дело се вратија на работа. После одржаните состаноци, платата којашто ќе ја добијат, како и условите за работа ќе бидат согласно нашите финансиски можности“, рече Сања Колеска Србоска, Директорка на Детска градинка Струга.

Како што Алсат веќе известуваше, овие негувателки и воспитувачки поради нерешениот статус се пријавуваат во Заводот како за невработени. Освен тоа, четири месеци во текот на годината не им плаќаат никаков хонорар за месеците јануари, јули, август и септември. Сега велат дека ќе чекаат до почетокот на март за да видат колку плата ќе добијат за да решат како ќе постапуваат понатаму./Алсат.мк

Мики Трајковски